Iran men AQSh Qatardyń araaǵaıyndyǵymen eki saǵat kelissóz júrgizdi
ASTANA. KAZINFORM – BUU Bas Assambleıasy aıasynda Iran men AQSh arasynda Qatardyń araaǵaıyndyǵymen kelissózderdiń kezekti kezeńi ótti. Kelissóz shamamen eki saǵatqa sozyldy, dep habarlaıdy IRNA.
Iran Syrtqy ister mınıstrliginiń resmı ókili Esmaıl Bagaıdiń málimetinshe, baılanystar barysynda AQSh tarapyna dıplomatııalyq protsesti qaıta bastaýǵa qatysty Tegerannyń negizgi talaptary jetkizilgen.
– Irannyń talaptary aıqyn jáne ekiushty túsindirýge kelmeıdi: AQSh-tyń agressıvti áreketterin, sonyń ishinde teńiz blokadasy men ekonomıkalyq qysymdy toqtatý, barlyq maıdandaǵy soǵysty aıaqtaý, Iran aktıvterin buǵattan shyǵarý, sondaı-aq jaǵalaýdaǵy memleketter arasyndaǵy ýaǵdalastyqtar negizinde qaýipsiz keme qatynasyn qamtamasyz etý, – dep jazdy Bagaı X áleýmettik jelisinde.
Iran tarapy kelissózderdiń Qatardyń deldaldyǵymen ótkenin málimdedi. Reuters te 23 qyrkúıekte AQSh pen Iran arasynda birneshe aıdan keıin alǵash ret janama kelissózder ótkenin habarlady. Agenttik dereginshe, taraptardyń ustanymdary arasynda áli de eleýli aıyrmashylyqtar bar.
Aıta keteıik, Iran áýe kompanııalary AQSh sanktsııalaryna baılanysty halyqaralyq birneshe reısti toqtatty.
