Iran men AQSh BUU Qaýipsizdik Keńesindegi kelissózder barysynda qatań málimdemeler jasady

ASTANA. KAZINFORM – Irannyń ıadrolyq baǵdarlamasy boıynsha dıalogty qalpyna keltirý perspektıvalary halyqaralyq arenada qaıtadan qyzý dıplomatııalyq pikirtalas taqyrybyna aınaldy, dep habarlaıdy Kazinform menshikti tilshisi. 

BUU Qaýipsizdik Keńesiniń seısenbi kúni ótken otyrysy barysynda Qurama Shtattar men Iran ókilderi ıadrolyq kelisim boıynsha kelissózge qaıta oralý sharttary týraly ótkir málimdemeler jasady. 

Amerıka tarapy tikeleı kelissózge daıyn ekenin málimdedi, ol úshin Tegeran óz aýmaǵynda ýran baıytýdan bas tartýy kerek. Iran delegatsııasy buny óz quqyqtaryn buzý dep atady.

AQSh prezıdentiniń Taıaý Shyǵys jónindegi arnaıy elshisiniń orynbasary Morgan Ortagýs Vashıngtonnyń resmı dıalogqa tek tikeleı jáne mazmundy kelissóz bolǵan jaǵdaıda ǵana ashyq ekenin atap ótti.

- Qurama Shtattar Iranmen resmı kelissózge daıyn, biraq Tegeran tikeleı jáne mazmundy dıalogqa daıyn bolǵan jaǵdaıda ǵana. Bul rette biz qarsy taraptan ne kútetinimizdi anyq bildirdik, ıaǵnı, eń aldymen, Iran aýmaǵynda ýran baıytýǵa bolmaıdy, - dep málimdedi ol.

Buǵan jaýap retinde Irannyń BUU janyndaǵy turaqty ókili Ámir Saıd Iravanı AQSh-ty ádil kelissóz protsesinen bas tartty dep aıyptady. Ol kezdesýde AQSh ýrandy nóldik baıytý saıasatyn talap etý arqyly adal kelissóz júrgizbeı otyrǵanyn málimdedi.

- Biz kez kelgen ádil jáne mazmundy kelissózdi quptaımyz, biraq nóldik baıytý saıasatyn talap etý ıAdrolyq qarýdy taratpaý týraly sharttyń qatysýshysy retindegi bizdiń quqyqtarymyzǵa qaıshy keledi jáne adal dıalog júrgizgisi kelmeıtinin kórsetedi, - dep atap ótti dıplomat, Iran qysym men qorqytýǵa boı aldyrǵysy kelmeıtinin qosyp ótip. 

Habarlanǵandaı, maýsym aıynda Iran men Izraıl arasyndaǵy 12 kúndik soǵysqa deıin eki tarap ıadrolyq konsýltatsııalardyń bes raýndyn ótkizdi. Keıinnen kelissóz protsesi toqtatyldy.

Qyrkúıek aıynyń sońynda Ulybrıtanııa, Frantsııa jáne Germanııa bastaǵan «snepbek» mehanızmi aıasynda Iranǵa qarsy birqatar sanktsııa men embargo qaıta qalpyna keltirildi, bul Reseı men Qytaı qarsylyǵyn týdyrdy. 

Iran óz kezeginde ıadrolyq qarý jasaý nıetin joqqa shyǵaryp, baǵdarlamasynyń beıbitshilik sıpaty týraly málimdeıdi.

Eske sala ketsek, Iran sanktsııalardy qaıtarý tetigi iske qosylǵan jaǵdaıda «qatań jaýap» qaıtarýǵa ýáde etti.