Iran men AQSh 26 aqpanda Jenevada taǵy da kelissóz ótkizedi
ASTANA. KAZINFORM — Irannyń ıadrolyq baǵdarlamasyna qatysty Iran men AQSh arasyndaǵy kelissózderdiń úshinshi raýndy 26 aqpan, beısenbi kúni Jenevada ótedi. Bul týraly Omannyń syrtqy ister mınıstri Badr ál-Býsaıdı málimdedi.
«AQSh pen Iran arasyndaǵy kelissózder osy beısenbide Jenevada ótedi. Biz kelisimdi aıaqtaý úshin qosymsha kúsh salýǵa daıynbyz jáne kelissózder oń kóńil kúıde ótedi dep úmittenemiz», dep jazdy Oman SІM basshysy Badr ál-Býsaıdı X áleýmettik jelisinde.
Pleased to confirm US-Iran negotiations are now set for Geneva this Thursday, with a positive push to go the extra mile towards finalizing the deal.
— Badr Albusaidi - بدر البوسعيدي (@badralbusaidi) February 22, 2026
Eske salaıyq, 6 aqpanda Omanda Iran men AQSh arasyndaǵy alǵashqy janama kelissózder Oman syrtqy ister mınıstri Badr ál-Býsaıdıdiń araǵaıyndyǵymen ótken edi. Taraptar dıalogty jalǵastyrýǵa keliskennen keıin keńes alý úshin taraǵan.
17 aqpanda kelissózder qaıta jandandy – bul joly Jenevada, BUU janyndaǵy Oman elshisiniń rezıdentsııasynda ótti. Ekinshi raýndtyń qorytyndysy boıynsha Iran syrtqy ister mınıstri Abbas Aragchı taraptar aldaǵy kelissózderdiń negizi bolatyn bazalyq qaǵıdattar boıynsha kelisimge kelgenin habarlaǵan.