Iran Medjlısiniń birneshe depýtaty el astanasyn aýystyrýǵa shaqyrdy
ASTANA. QazAqparat - Iran Medjılisiniń 73 depýtaty Joǵarǵy kóshbasshy aıatolla Alı Hameneıge el astanasyn Tegerannan basqa qalaǵa aýystyrýǵa shaqyrǵan úndeý joldady, dep habarlaıdy Anadolaý agenttigi.
Depýtattar óz úndeýlerinde qorshaǵan ortanyń lastanýyna, kólik keptelisterine jáne Tegeranda halyqtyń kóptigine basa nazar aýdarǵan.
Tegerannan astanany aýystyrý jónindegi zań jobasyn parlament 2013 jyldyń jeltoqsanynda bekitken bolatyn, biraq ol qaǵaz júzinde qaldy.
Budan basqa depýtat Abýlfazl Abýtýrabı osy jylǵy qańtarda Tegerandaǵy bıznes-ortalyqtardyń birinde bolǵan, 26 adamnyń ómirin qıyp ketken órt jaıly eske saldy.
«Bul órt Tegerandaǵy qurylys salasyndaǵy kúrdeli máseleniń bir aıǵaǵy», - dedi Abýtýrabı.
Onyń aıtýynsha, Irannyń Joǵaǵy kóshbasshysy bul jaǵdaıǵa jetkilikti kóńil bólmeıdi.
