Iran Lıvandaǵy jaǵdaıǵa baılanysty AQSh-pen deldaldar arqyly júrgiziletin baılanystardy toqtatty
ASTANA. KAZINFORM — Tegeran Vashıngtonmen dıalogty jalǵastyrý múmkindigin Izraıldiń Lıvandaǵy áskerı operatsııalaryn toqtatý sondaı-aq bitim sharttarynyń oryndalýymen baılanystyryp otyr, dep habarlaıdy Kazinform agenttiginiń menshikti tilshisi.
Irannyń kelissóz júrgizýshi toby Izraıldiń Lıvanǵa soqqylary jalǵasyp jatqan jaǵdaıda AQSh-pen deldaldar arqyly habar almasýdy toqtata turady. Bul týraly dúısenbi kúni Tasnim agenttigi óz derekkózderine silteme jasap habarlady.
Agenttik málimetinshe, Tegeranda atysty toqtatý rejımi barlyq baǵyttarǵa, sonyń ishinde Lıvanǵa da qatysty degen ustanym qalyptasqan. Osyǵan baılanysty Izraıldiń jalǵasyp jatqan áskerı operatsııalary qol jetkizilgen kelisimderdi buzý retinde qarastyrylyp otyr.
Sondaı-aq Iran men onyń «qarsylyq osi» dep atalatyn odaqtas kúshteri Izraıl men onyń seriktesterine qysymdy odan ári kúsheıtý múmkindigin qarastyryp jatqany aıtyldy. Onyń ishinde Ormýz buǵazyn tolyq jabý jáne basqa da baǵyttardaǵy, sonyń ishinde Bab-el-Mandeb buǵazy mańyndaǵy is-qımyldardy jandandyrý máselesi bar.
— Bir maıdandaǵy buzýshylyq — barlyq maıdandaǵy atysty toqtatý rejıminiń buzylýy degen sóz. Kez kelgen mundaı árekettiń saldary úshin AQSh pen Izraıl jaýapty bolady, — dep málimdedi Irannyń Syrtqy ister mınıstri Abbas Arakchı dúısenbi kúni X áleýmettik jelisinde. Ol bul sózinde Izraıldiń Lıvandaǵy operatsııalaryn meńzedi.
For immediate attention:
— Seyed Abbas Araghchi (@araghchi) June 1, 2026
The ceasefire between Iran and the US is unequivocally a ceasefire on all fronts, including in Lebanon.
Its violation on one front is a violation of the ceasefire on all fronts.
The US and Israel are responsible for the consequences of any violation.
Iran agenttiginiń habarlamasynda dıalogty qaıta bastaý tek Gaza sektoryndaǵy jáne Lıvandaǵy áskerı is-qımyldar toqtatylǵannan keıin, sondaı-aq Izraıl kúshteri Iran basyp alynǵan aýmaqtar dep sanaıtyn Lıvan jerlerinen tolyq shyǵarylǵan jaǵdaıda ǵana múmkin bolatyny atap kórsetilgen.
Sonymen qatar, bul talaptar oryndalyp, Iran men onyń óńirdegi odaqtastarynyń ustanymy eskerilmeıinshe, dıalog qaıta jandandyrylmaıtyny aıtylǵan.
Buǵan deıin AQSh Iranǵa shabýyl jasaǵanyn jazdyq.
