Iran, Lıvan jáne Izraılde qaqtyǵystardyń shıelenisýinen 1 800 adam kóz jumdy — DDU

ASTANA. KAZINFORM — Dúnıejúzilik densaýlyq saqtaý uıymynyń (DDU) bas dırektory Tedros Adanom Gebreıesýs taratqan málimetterge qaraǵanda, Taıaý Shyǵystaǵy qaqtyǵystar ýshyǵa bastaǵannan beri Iran, Lıvan jáne Izraılde 1 800-den astam adam qaza taýyp, 12 500 adam jaraqat aldy, dep habarlaıdy TASS.

— On kúnnen astam ýaqyt buryn Taıaý Shyǵystaǵy qaqtyǵys shıelenise bastady. Iranda 1 300-den astam adam qaza taýyp, 9 myń adam jaralandy. Lıvanda keminde 570 adam kóz jumsa, 1 400-den astam adam zardap shekti. Izraılde 15 adam mert bolyp, 2 adam jaralandy, — dep jazdy ol. 

Sonymen qatar bas dırektor aımaqtaǵy densaýlyq saqtaý nysandaryna shabýyldardyń kóbeıgenin atap ótti. Onyń aıtýynsha, 28 aqpannan beri uıym Iranda — 18, Lıvanda — 25, Izraılde eki shabýyldy tirkegen.

— Bul shabýyldar adam ómirin qıyp ǵana qoımaı, sondaı-aq qaýymdastyqtardy asa qajet bolǵan kezde medıtsınalyq kómekten aıyrady, — dedi Gebreıesýs.

Aıta keteıik, 28 aqpanda AQSh pen Izraıl Iranǵa qarsy áskerı operatsııa bastady. Irannyń iri qalalary, sonyń ishinde Tegeranǵa da soqqy jasaldy. Aq úı bul shabýyldy Tegerannan shyqqan zymyrandyq jáne ıadrolyq qaterlerge silteme jasap aqtady. Islam revolıýtsııasy saqshylar korpýsy Izraıldegi nysandarǵa shabýyl jasap, keń aýqymdy jaýap operatsııasyn jarııalady. Sondaı-aq AQSh-tyń Bahreın, Iordanııa, Katar, Kýveıt, BAÁ jáne Saýd Arabııasyndaǵy nysandaryna soqqy berildi. Iranǵa jasalǵan soqqylardan rýhanı kósem Aıatolla Álı Hameneı men Islam respýblıkasy basshylyǵyndaǵy taǵy birneshe mańyzdy tulǵalar qaza tapty.

Eske sala keteıik, Dúnıejúzilik densaýlyq saqtaý uıymynyń dereginshe, 2024 jyldyń shildesinen 2025 jyldyń qarasha aıyna deıin Gazada 1092 adam medıtsınalyq kómekke jete almaı kóz jumdy.