Iran quramasy fýtboldan álem chempıonatyna qatyspaıdy

ASTANA. KAZINFORM — Bıyl jazda AQSh-ta fýtboldan álem chempıonaty ótedi. Degenmen Irannyń sport jáne jastar mınıstri Ahmad Donıamalı memlekettik telearnaǵa bergen suhbatynda el fýtbolshylary AQSh-ta qaýipsiz bolmaıtynyn aıtty, dep habarlaıdy Euronews.

Mınıstrdiń aıtýynsha, Kanada, AQSh jáne Meksıka birlesip ótkizetin álem chempıonatyna Iran quramasynyń qatysýy «múmkin emes».

Bıyl Iran quramasynyń álem chempıonatyna qatysýy josparlanǵan bolatyn, biraq mınıstr Ahmad Donıamalı fýtbolshylardyń AQSh-ta qaýipsiz emestigin aıtyp, olardyń qatysa almaıtynyn málimdedi. Bul suhbat beınejazbada jarııalandy.

— Olar Iranǵa qarsy jasaǵan zulym áreketteri — 8–9 aı ishinde bizge eki soǵys júrgizip, myńdaǵan halqymyzdy óltirip, azaptady — biz álem chempıonatyna qatysa almaımyz, — dedi Donıamalı.

Iran quramasy 15 maýsymda Kalıfornııadaǵy Inglvýd qalasynda Jańa Zelandııamen, 21 maýsymda Belgııamen oınap, al toptyq kezeńdi 26 maýsymda Sıetlde Egıpetpen aıaqtaýy tıis edi.

FIFA Iran quramasyna AQSh-qa barýǵa ruqsat beriledi dep kútýde.

Ótken aptada prezıdent Donald Tramp osy suraqqa jaýap berdi.

— Iran quramasy 48 el qatysatyn týrnırge qatysa ma, joq pa, maǵan shynymen báribir, — dedi ol.

FIFA prezıdenti Djannı Infantıno seısenbi kúni Tramppen «týrnırge daıyndyq barysyn talqylaý úshin» kezdesti jáne Iranǵa AQSh-qa barýǵa ruqsat beriletinine kepildik aldy.

— Kezdesý barysynda prezıdent Tramp Iran quramasy AQSh-taǵy týrnırge mindetti túrde qatysa alatynyn taǵy bir márte atap ótti, — dedi Infantıno.

Osyǵan deıin Irandaǵy áýe soqqylarynan keıin Tegeranda «qara jańbyr» jaýyp, aýa lastanǵanyn jazǵan bolatynbyz.