Iran «kózden ǵaıyp» ushaq jasap shyǵardy
ASTANA. 5 aqpan. QazAqparat - Iran Qaher-313 («Jeńimpaz») dep atalatyn otandyq ushaǵynyń tusaýyn kesip, el nazaryna usyndy. Bastan-aıaq ırandyq mamandar jasap shyqqan bul áskerı ushaq radardyń nazaryna ilikpeıdi eken. Munyń artyqshylyǵy men ereksheligi osynda. Bul jaıynda IRNA agenttigi habar taratty.
muslim.kz saıtynyń jazýynsha, el tizginin ustaǵan Mahmut Ahmedınejad ushaqqa joǵary baǵa berdi. Ushaqty synaǵan ushqyshtar da ushaqtyń múmkindikterine tánti boldy. Prezıdent óz sózinde Irannyń ózge elderge kúsh kórsetpeıtinin málimdep, jańa ushaq qorǵanys maqsatynda qoldanylatynyn jetkizdi.
Jańa ushaq áskerı urysqa saqadaı saı ázirligimen, bıik ushatyn, qysqa alańda ushyp-qona alatyn múmkindigimen jáne basqarýdyń qarapaıym tásilderimen erekshelenedi.
