Iran kórshi elderge shabýyldaryn dereý toqtatýy kerek — BUU Qaýipsizdik Keńesi

ASTANA. KAZINFORM — BUU Qaýipsizdik Keńesi Iran Islam Respýblıkasynyń AQSh pen Izraıldiń shabýyldaryna jaýap retinde kórshi elderge shabýyldaryn aıyptaıtyn qarar qabyldady.

Bahreınniń Parsy shyǵanaǵy yntymaqtastyq keńesi atynan usynǵan qujatty Qaýipsizdik keńesiniń 13 múshesi qoldady, al ekeýi — Reseı men Qytaı — qalys qaldy. 

Bahreın ókiliniń málimdeýinshe, 135 memleket birlesip ázirlegen qararda Irannan kórshiles elderge shabýyldardy dereý toqtatý talap etiledi. Qujat avtorlary Islam Respýblıkasynyń bul áreketterin halyqaralyq quqyqty buzý jáne halyqaralyq qaýipsizdikke eleýli qater tóndirý dep ataıdy.

Qujatta sondaı-aq «Irannyń Ormýz buǵazy arqyly halyqaralyq keme qatynasyn jabýǵa, kedergi keltirýge nemese basqasha aralasýǵa baǵyttalǵan kez kelgen áreketteri nemese qaýipteri aıyptalady». 

Bahreınniń BUU-daǵy turaqty ókili Djamal Fares Alrovaı qarardy qabyldaý Parsy shyǵanaǵy memleketteriniń jahandyq ekonomıkadaǵy negizgi rólin kórsetetinin málimdedi.

— Sondyqtan bul aımaqtyń qaýipsizdigin qamtamasyz etý aımaqtyq másele ǵana emes, jahandyq ekonomıkalyq turaqtylyq pen energetıkalyq qaýipsizdikpen tyǵyz baılanysty ortaq halyqaralyq jaýapkershilik. Halyqaralyq qaýymdastyq Irannyń ásirese jahandyq ekonomıka, energetıka, qaýipsizdik jáne jahandyq saýda qaýipsizdigi úshin strategııalyq mańyzy bar aımaqta ulttardyń turaqtylyǵyna qaýip tóndiretin egemen memleketterge bul shabýyldaryn qabyldamaýǵa berik nıettendi, — dep málimdedi ol.

Reseı beıbit turǵyndar men azamattyq ınfraqurylymǵa jasalǵan barlyq shabýyldardy aıyptaıtyn jáne barlyq taraptardy zorlyq-zombylyqty toqtatýǵa shaqyratyn óz qarar jobasyn usyndy. 

Alaıda bul joba qajetti daýys sanyn jınaı almady. Ony nebári tórt delegatsııa qoldap daýys berdi — Reseıdiń ózi, Qytaı, Pákistan jáne Somalı, eki el qarsy daýys berdi, al toǵyzy qalys qaldy.

Daýys berýden keıin Irannyń BUU-daǵy elshisi Ámir-Saıd Iravanı Keńeske qarardyń qabyldanýyna qatysty «tereń ókinishin» bildirip, Keńes aldynda sóz sóıledi, dep habarlaıdy Al Jazeera. 

— Bul Qaýipsizdik Keńesi men halyqaralyq qaýymdastyq úshin óte qaıǵyly kún. Búgingi sheshimniń qabyldanýy — Keńestiń abyroıyna jasalǵan aýyr soqqy jáne onyń bedeline máńgilik daq qaldyrady, — dedi Iravanı.

Ol sondaı-aq 28 aqpanda AQSh pen Izraıldiń shabýyldary bastalǵannan beri 1348-den astam beıbit turǵyn qaza taýyp, 17 myńnan astam adam jaraqat alǵanyn málimdedi.

Onyń aıtýynsha, turǵyn úıler men aýrýhanalardy qosa alǵanda 19 myńnan astam azamattyq nysan zaqymdalǵan.