Iran korpýs qolbasshysy Hosseın Salamıdyń qaza tapqanyn rastady

ASTANA. KAZINFORM – Iran ıslam revolıýtsııasy saqshylar korpýsynyń qolbasshysy Hosseın Salamıdyń qaza tapqanyn resmı túrde rastady, dep jazdy Rıa novostı.

— Hosseın Salamı men ıslam revolıýtsııasynyń basqa da qorǵaýshylary shahıd bolǵany týraly KSIR málimdeme jasady. Iran jaqyn arada halyqty jaýdyń qylmystyq operatsııasy men oǵan beriletin jaýap sharalary týraly habardar etedi, — delingen Islam revolıýtsııasy saqshylar korpýsynyń málimdemesinde.

Buǵan deıin Iran bıligi Izraıldiń Tegerandaǵy turǵyn úılerge, sonyń ishinde joǵary laýazymdy áskerı jáne sheneýnikter turǵan úılerge soqqy jasaǵanyn habarlaǵan bolatyn. Sondaı-aq Natanz qalasyndaǵy ıadrolyq nysan men eldiń soltústik-batysyndaǵy ırandyq áskerı bólimsheler ornalasqan aımaqtar da shabýylǵa ushyraǵany aıtyldy.

 Aıta keteıik, Izraıl Iranǵa soqqy berip, áýe keńistigin jaýyp tastady.