Iran kelisimge múddeli, biraq AQSh usynǵan sharttarǵa daıyn emes – Tramp
ASTANA. KAZINFORM — Iran AQSh-pen kelisimge múddeli, alaıda ázirshe ózi «durys mámile» dep sanaıtyn sharttardy qabyldaýǵa daıyn emes. Bul týraly AQSh prezıdenti Donald Tramp málimdedi, dep habarlaıdy Kazinform agenttiginiń Vashıngtondaǵy menshikti tilshisi Republic basylymyna silteme jasap.
Óńirdegi shıelenis saqtalyp otyrǵan tusta Tramp AQSh-tyń aımaqtaǵy negizgi aýmaqtardy, sonyń ishinde Ormýz buǵazy mańyn baqylaýda ustap otyrǵanyn atap ótti.
Sondaı-aq AQSh prezıdenti Irannyń ekonomıkalyq jaǵdaıynyń aýyr ekenin, atap aıtqanda elde ınflıatsııa deńgeıi joǵary ekenin jáne áskerı resýrstardyń jetispeıtinin aıtty.
Tramp Iranǵa qarsy ekonomıkalyq sharalar AQSh-tyń áskerı múmkindikteri shekteýli degendi bildirmeıtinin málimdedi.
— Olardyń aqshasy joq, floty joq, avıatsııasy joq. Olar sarbazdaryna jalaqy tólemeıdi, polıtsııa qyzmetkerlerine de jalaqy tólemeıdi. Olarda ınflıatsııa 350% deńgeıinde, — dedi Donald Tramp.
AQSh prezıdentiniń aıtýynsha, Iran kelisimge qol jetkizýge múddeli bolǵanymen, Vashıngton usynǵan sharttarǵa ázirshe kelispegen.
— Olar kelisimge qýana-qýana keler edi, biraq meniń oıymsha, olar durys mámilege kelýge áli daıyn emes, — dedi prezıdent AQSh.
Buǵan deıin Tramp Iranǵa qarsy tarıhtaǵy «eń joıqyn ekonomıkalyq operatsııany» bastaǵanyn málimdep, Tegeranǵa qarjylyq, iskerlik nemese memlekettik qoldaý kórsetetin elderge «orasan zor ekonomıkalyq saldar» bolatynyn eskertken.
Al Irannyń syrtqy ister mınıstri Abbas Aragchı Tramptyń Tegeranǵa ekonomıkalyq qysym jasaý jónindegi sońǵy naýqanyn synap, ony sátsizdikke ushyrady dep baǵalady.
Eske salaıyq, buǵan deıin Iran AQSh-tyń qoqan-loqysyna jaýap retinde kúırete soqqy beretinin aıtqan edi.
