Iran Qazaqstannan jetkiziletin 864 taýarǵa ımporttyq baj stavkasyn tómendetedi
NUR-SULTAN. QazAqparat - Iran Qazaqstannan jetkiziletin 864 taýarǵa ımporttyq baj stavkalaryn tómendetedi. Bul týraly búgin QR Ulttyq ekonomıka vıtse-mınıstri Serik Jumanǵarın aıtty, dep habarlaıdy QazAqparat tilshisi.
«Eýrazııalyq ekonomıkalyq odaqqa múshe memleketter men Iran Islam Respýblıkasy arasyndaǵy erkin saýda aımaǵyn qurýǵa alyp keletin ýaqytsha kelisimge 2018 jyldyń 17 mamyrynda Astana qalasynda qol qoıyldy. Kelisim boıynsha kelissózder bastaý týraly sheshimdi EAEO memleketteriniń basshylary 2016 jyly qabyldady. Bul rette Iranmen erkin saýda aımaǵyn qurý bastamasyn Memleket basshysy 2014 jyly Kaspıı mańy memleketteri basshylarynyń sammıtinde usyndy. Bul kelisimdi iske asyrý otandyq taýarlardy 80 mln-nan astam halqy bar Irannyń perspektıvaly naryǵyna shyǵarý arqyly olardyń eksportyn ulǵaıtýǵa múmkindik beredi. Jalpy alǵanda osyndaı kelisim eksportty álemdik naryqqa shyǵarý quraldarynyń biri bolyp sanalady», - dedi vıtse-mınıstr QR Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda sáıkesinshe zań jobasyn tanystyra kele.
Onyń dereginshe, Qazaqstan men Irannyń ózara saýda kólemi 2018 jyly 516,3 mln AQSh dollaryna jetti. Onyń ishinde Iranǵa eksport 426,7 mln, ımport 89,5 mln dollardy qurady. Qazaqstannyń negizgi taýarlarynyń ishinde arpa 272 mln, bolat ılek 87 mln, raps tuqymy 17 mln jáne qoı eti 11,6 mln dollarǵa jetkizildi. Al, Senat qaraýyna túsken bul kelisimge sáıkes Iran tarapy 864, onyń ishinde 262 aýyl sharýashylyǵy, 602 ónerkásiptik taýarǵa qatysty ımporttyq baj stavkalaryn tómendetedi. Iran naryǵyna sıyr jáne qoı etti jetkizý stavkasy 26-dan 5-10, burshaq daqyldary 55-ten 5-10, ósimdik maıyn 20-dan 10, makaron jáne kondıterlik ónimderdi 55-ten 14-20, bolat ılek 20-dan 15, relster 5-ten 4 paıyzǵa deıin tómedetý jeńildetilgen tarıftermen jetkizýge múmkindik týady.
«Bul taýarlar búgingi kúni Qazaqstannyń Iranǵa eksportynyń 292 mln dollaryn nemese 54 paıyzdan astamyn alyp otyr. EAEO-ǵa múshe elder 502, onyń ishinde 126 aýyl sharýashylyǵy, 376 ónerkásiptik taýar boıynsha ımporttyq baj stavkalaryn tómendetti», - dedi S.Jumanǵarın.
