Iran Qazaqstannan aýyl sharýashylyǵy ónimderiniń ımportyn ulǵaıtýǵa múddeli
ASTANA. KAZINFORM - Eýrazııalyq ekonomıkalyq odaqtyń agroónerkásiptik saıasat jónindegi keńesiniń 7-otyrysy aıasynda aýyl sharýashylyǵy mınıstri Aıdarbek Saparov Iran Islam Respýblıkasynyń aýyl sharýashylyǵy mınıstriniń orynbasary Fathı Akbarmen ekijaqty kezdesý ótkizdi, dep habarlaıdy mınıstrliktiń baspasóz qyzmeti.
Aıdarbek Saparov Irandy Qazaqstannyń agroónerkásiptik kesheni ónimderiniń eksportyn keńeıtý úshin barynsha perspektıvaly naryqtardyń biri retinde atap ótti.
2025 jyldyń qorytyndysy boıynsha Qazaqstan men Iran arasyndaǵy agroónerkásiptik kesheni ónimderiniń taýar aınalymy 55,8%-ǵa ósti. Ekijaqty saýdanyń jalpy kóleminiń 79%-yn agroónerkásiptik ónimder qurady. Iranǵa aýyl sharýashylyǵy ónimderiniń eksporty 97%-ǵa artty.
-Biz Iranǵa aýyl sharýashylyǵy ónimderin turaqty ári boljamdy kólemde jetkizýdi qamtamasyz etýdi, ónim nomenklatýrasyn keńeıtýdi jáne uzaq merzimdi, ózara tıimdi aýyl sharýashylyǵy salasyndaǵy yntymaqtastyqty nyǵaıtýdy maqsat etip otyrmyz, – dep atap ótti Aıdarbek Saparov.
Óz kezeginde Fathı Akbar Irannyń Qazaqstannyń agroónerkásiptik kesheni ónimderiniń ımportyn ulǵaıtýǵa jáne basym baǵyttar boıynsha praktıkalyq yntymaqtastyqty keńeıtýge múddeli ekenin jetkizdi.
Taraptar logıstıkalyq múmkindikterdi damytý, birlesken ınvestıtsııalyq jobalardy iske asyrýdy qosa alǵanda, ózara is-qımyldyń ózekti máselelerin talqylady.
Yntymaqtastyqtyń negizgi baǵyttarynyń biri – astyq ónimderin jetkizýdi ulǵaıtý. Qazaqstanda qajetti shıkizat bazasy jáne astyqtyń iri ári turaqty partııalaryn qalyptastyrý áleýeti bar. Bul qazaqstandyq ónimniń Iran naryǵyndaǵy úlesin uzaq merzimdi perspektıvada arttyrýǵa múmkindik beredi.
Ósimdik maılary eksportynyń kólemin arttyrýdyń da áleýeti joǵary.
Kezdesý barysynda tuqym sharýashylyǵyn damytýǵa, «halal» ónimder naryǵyna, zamanaýı agrotehnologııalar salasyndaǵy tájirıbe almasýǵa, sondaı-aq aýyl sharýashylyǵyna ozyq sheshimderdi engizýge erekshe nazar aýdaryldy.
Investıtsııalyq yntymaqtastyq ta jeke baǵyt retinde qarastyryldy. Taraptar saýda kólemin ulǵaıtyp qana qoımaı, agroónerkásiptik keshende jańa óndiristik jáne logıstıkalyq tizbekter qalyptastyrýǵa múmkindik beretin birlesken jobalardy iske asyrýǵa múddeli.
Kezdesý qorytyndysy boıynsha taraptar praktıkalyq yntymaqtastyqty jandandyrýǵa jáne agroónerkásiptik saladaǵy ózara is-qımylǵa jańa serpin berýge ýaǵdalasty.
Osyǵan deıin Qazaqstan men Qyrǵyzstan arasyndaǵy AÓK ónimderiniń taýar aınalymy 41,5%-ǵa óskeni týraly jazdyq.
