Iran Qazaqstanǵa 128 mln dollardyń aýyl sharýashylyǵy ónimin eksporttady
ASTANA. KAZINFORM — Irannyń Qazaqstanǵa aýyl sharýashylyǵy ónimderiniń eksporty 128 mln dollarǵa jetti, dep habarlaıdy IRNA agenttigi.
Irannyń Qazaqstanǵa aýyl sharýashylyǵy ónimderin eksporttaý kólemi Iran kúntizbesi boıynsha 1404 jyldyń alǵashqy 10 aıynda (2025–2026 jyldarǵa sáıkes keledi) 128 mln AQSh dollaryn qurady.
Bul týraly Iran Aýyl sharýashylyǵy jıhady mınıstrliginiń halyqaralyq ister departamenti dırektorynyń mindetin atqarýshy Hasan Momenı málimdedi.
Ol Iran Syrtqy ister mınıstrliginiń TMD elderi jónindegi birinshi departamentiniń dırektory Manýchehr Moradımen kezdesý barysynda atalǵan kezeńde Irannyń Qazaqstanǵa jalpy eksporty 214 mln dollardy quraǵanyn aıtty. Onyń jartysynan astamy aýyl sharýashylyǵy ónimderiniń úlesine tıesili.
Sonymen qatar Qazaqstannan Iranǵa ımport kólemi 47 mln dollar bolǵan. Onyń ishinde 33 mln dollar aýyl sharýashylyǵy taýarlaryna tıesili.
Hasan Momenıdiń aıtýynsha, Qazaqstannan ımporttalatyn ónimderdiń shamamen 80%-y Irannyń azyq-túlik qaýipsizdigin qamtamasyz etýge baǵyttalǵan. Bul óz kezeginde «Soltústik – Ońtústik» halyqaralyq kólik dáliziniń strategııalyq mańyzyn kórsetedi.
Osyǵan deıin Irannyń ónerkásip, kenishter jáne saýda mınıstri Seıed Mohammad Atabak EAEO aıasynda táýelsiz qarjylyq esep aıyrysý tetigin qurý bastamasyn kóterdi.
