Iran Qazaqstan tarıhyna qatysty qundy qoljazbalar kóshirmesin ala keldi

ASTANA. KAZINFORM — Elimizde ál-Farabı tarıhı-mádenı kesheni salynady. Bul týraly Aqordada Iran Islam Respýblıkasynyń Prezıdenti Masýd Pezeshkıanmen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.

— Mádenı-gýmanıtarlyq baılanystyń da mán-mańyzy zor. Irannyń muraǵattarynda Qazaq tarıhyna qatysty kóptegen jádiger saqtalǵan. Ǵalymdarymyz ál-Farabı murasyn birlese zertteýdi qolǵa aldy. Qazaq jerinde uly oıshylǵa arnalǵan tarıhı-mádenı keshen salý máselesi qarastyrylyp jatyr. Sonymen qatar búgin Iran delegatsııasy Qazaqstan tarıhyna qatysty birqatar qundy, eski qoljazbanyń kóshirmesin ala keldi. Sol úshin sizge zor rızashylyǵymdy bildiremin. Bul qadam qos halyqtyń tarıhı baılanysynyń tereń ekenin dáleldeı túsedi, — dedi Qasym-Jomart Toqaev.

Buǵan deıin Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń Prezıdenti Masýd Pezeshkıandy qarsy alǵanyn jazǵan edik. 

Qazirgi ýaqytta taraptar joǵary deńgeıdegi kelissózder júrgizip jatyr. Onyń barysynda saýda-ekonomıkalyq, kólik-logıstıka jáne mádenı-gýmanıtarlyq salalardaǵy qazaq-ıran yntymaqtastyǵyn odan ári nyǵaıtý máseleleri talqylanbaq. 

Buǵan deıin Kazimform-nyń analıtkalyq sholýshysy Astana men Tegeran arasyndaǵy kelissózdiń astaryna úńilip kórgen edi.