Iran Qaýipsizdik keńesiniń hatshysy AQSh-pen kelissózderden keıin Omanǵa bardy
ASTANA. KAZINFORM – Irannyń Joǵary ulttyq qaýipsizdik keńesiniń hatshysy Alı Larıdjanı AQSh-pen ıadrolyq baǵdarlama boıynsha janama kelissózder qaıta jandanǵannan keıin birneshe kún ótken soń Omanǵa saparmen keldi. Bul týraly IRNA agenttigi habarlady.
Maskatta Alı Larıdjanı Haısam ben Tarık Al Saıdpen, sondaı-aq Oman Sultandyǵynyń syrtqy ister mınıstri Badr bın Hamad al-Býsaıdımen kezdesý ótkizdi. Kelissózderdiń kún tártibinde óńirlik jáne halyqaralyq ózekti máseleler, sondaı-aq Iran men Oman arasyndaǵy ekijaqty ekonomıkalyq yntymaqtastyqtyń keleshegi talqylandy.
Irandyq BAQ-tyń málimetinshe, bul sapar Tegerannyń óńirlik konsýltatsııalary aıasynda aldyn ala josparlanǵan. Sonymen birge ol Iran men AQSh arasyndaǵy dıalogtyń qaıta bastalýymen tuspa-tus kelip otyr. Atalǵan dıalog ótken aptada Oman aýmaǵynda ótti jáne byltyr jazda Iran men Izraıl arasynda 12 kúnge sozylǵan shıelenisten keıingi taraptardyń alǵashqy baılanysy boldy. Sol kezeńde qysqa ýaqytqa amerıkalyq áskerı kúshter de tartylǵan edi.
Tegeran bıligi Maskattaǵy kelissózderdiń aldyn ala sıpatta ótkenin jáne taraptardyń dıplomatııalyq protsesti jalǵastyrýǵa daıyndyǵyn baǵalaýǵa baǵyttalǵanyn atap ótti. Iran ókilderiniń aıtýynsha, alǵashqy kezeńde naqty kelisimder emes, yqtımal dıalogtyń jalpy qaǵıdattary men sheńberi qarastyrylǵan.
Buǵan deıin Iran Syrtqy ister mınıstrligi Tegerannyń kelissózderdi tek ıadrolyq máselemen shekteýdi talap etetinin jáne ıAdrolyq qarýdy taratpaý týraly shart aıasyndaǵy óz quqyqtarynyń saqtalýyn mańyzdy sanaıtynyn málimdegen bolatyn. Sondaı-aq Iran bıligi kelissóz protsesine syrtqy qysymnyń, sonyń ishinde Izraıl men jekelegen eýropalyq elderdiń yqpalyna narazylyq bildirgen.
Irandyq derekkózderge súıensek, Omanǵa sapardan keıin Alı Larıdjanı óńirlik týrnesin jalǵastyryp, Qatarǵa barýy múmkin.
Aıta keteıik, bir kún buryn Irannyń Atom energııasy uıymynyń basshysy Mohammad Eslamı barlyq sanktsııalar tolyq alynǵan jaǵdaıda ýran baıytý deńgeıin tómendetý múmkindigin joqqa shyǵarmaǵan edi.
