Iran: Qatardaǵy AQSh bazasyna jasalǵan soqqy — Vashıngton agressııasyna jaýap

ASTANA. KAZINFORM —  Tegeranda bul operatsııanyń proportsıonaldy bolǵany jáne Qatarǵa qaýip tóndirmeıtini aıtyldy, dep habarlaıdy Kazinform agenttiginiń menshikti tilshisi. 

Irannyń Joǵarǵy ulttyq qaýipsizdik keńesi Katardaǵy Al-Ýdeıd amerıkalyq áskerı bazasyna jasalǵan soqqyǵa baılanysty resmı málimdeme jasady.

Málimdeme mátinin Tasnim aqparat agenttigi jarııalady.

— AQSh-tyń Irannyń ıadrolyq nysandaryna jasaǵan óreskel ári agressıvti soqqysyna jaýap retinde Iran Islam Respýblıkasy qarýly kúshteri Al-Ýdeıdtegi amerıkalyq áskerı bazaǵa zymyran soqqysyn jasady, — delingen málimdemede.

Keńes Iran tarapynan atylǵan zymyrandardyń sany AQSh kúshteri Irannyń ıadrolyq nysandaryna jasaǵan shabýyl kezinde qoldanǵan oq-dárilerdiń sanyna teń ekenin naqtylady. Sonymen qatar, Tegeran shabýyl nysany retinde Katardyń turǵyn aýdandary men qalalyq ınfraqurylymynan alys aımaq tańdalǵanyn basa aıtty.

— Bul operatsııa bizdiń dos Katar memleketi men onyń halqy úshin eshqandaı qaýip tóndirgen joq. Iran Dohamen jyly jáne tarıhı qarym — qatynasty saqtaýǵa áli de daıyn, — dep málimdedi Ulttyq qaýipsizdik keńesi.

Iran tarapy Tegerannyń áreketteri ózin-ózi qorǵaý quqyǵy aıasynda júzege asqanyn jáne halyqaralyq quqyqqa sáıkes agressııaǵa «aına-qatesiz jaýap» bolǵanyn atap ótti.

Eske salsaq, dúısenbi keshke Iran Katarda ornalasqan Al-Ýdeıd amerıkalyq áskerı bazasyna soqqy jasaǵan edi.