Iran kásipkerleriniń Mańǵystaýda birlesken ekonomıkalyq aımaq qurý usynysyn qoldaımyz — Toqaev
ASTANA. KAZINFORM — Qazaqstan Iran kásipkerleriniń Mańǵystaý oblysy aýmaǵynda birlesken erkin ekonomıkalyq aımaq qurý týraly usynysyn qoldaıdy. Bul týraly Aqordada Iran Islam Respýblıkasynyń Prezıdenti Masýd Pezeshkıanmen kelissózder qorytyndysyna oraı BAQ ókilderine arnalǵan birlesken málimdeme barysynda Memleket basshysy Qasym-Jomart Toqaev aıtty.
— Biz Irandy Ońtústik-Shyǵys Azııaǵa jáne Afrıka qurlyǵyna shyǵatyn qaqpa retinde qarastyramyz. Osy múmkindikti paıdalanyp, Iran basshylyǵyna Bender-Abbas qalasyndaǵy Shahıd-Radjaı portynan Qazaqstanǵa jer telimin bergeni úshin shynaıy rızashylyǵymdy bildirdim. Bul qadam eki el yqpaldastyǵyn odan ary nyǵaıta túsetini sózsiz, — dedi Memleket basshysy.
Prezıdent óńiraralyq baılanystar ózara yntymaqtastyqqa tyń serpin berýge tıistigin basa aıtty.
— Qazir Qazaqstannyń birqatar oblysy men Irannyń provıntsııalary arasynda seriktes qatynas ornaǵan. Biz Iran kásipkerleriniń Mańǵystaý oblysy aýmaǵynda birlesken erkin ekonomıkalyq aımaq qurý týraly usynysyn quptaımyz. Bul qadam Qazaqstanda Iran shıkizatynan daıyn ónim jasaýǵa, ony aımaq elderine taratýǵa múmkindik beredi dep senemiz, — dedi Qasym-Jomart Toqaev.
Buǵan deıin Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń Prezıdenti Masýd Pezeshkıandy qarsy alǵanyn jazǵan edik.
Keıinnen Qasym-Jomart Toqaev pen Masýd Pezeshkıan shaǵyn quramda kelissóz júrgizdi.
Sonymen qatar kelissózder qorytyndysy boıynsha Qasym-Jomart Toqaev pen Masýd Pezeshkıan Birlesken málimdeme qabyldap, 8 qujatqa qol qoıyldy.