Iran Kaspıı teńizindegi munaı ken oryndary Reseımen kelissózder júrgizbek

ASTANA. QazAqparat - Iran Kaspıı teńizindegi ken oryndaryn barlaý jáne óńdeý boıynsha Reseı, Norvegııa jáne Qytaı kompanııalarymen kelissózder jasaıdy. Bul jaıly «Khazar Exploration and Production Co» (KEPCO) kompanııasynyń halyqaralyq ister jónindegi dırektory Ramın Hodafarın málim etti, dep habarlaıdy IRNA.

Onyń aıtýynsha, sońǵy aptada Reseı, Norvegııa jáne Qytaıdyń munaı men gazdy burǵylaý jáne barlaý salasyndaǵy jetekshi kompanııalardyń ókilderimen kezdesýleri ótken. Kezdesý barysynda Kaspıı teńizindegi ken oryndaryn óńdeý jáne damytý boıynsha yntymaqtastyq baılanystardyń múmkindikteri talqylandy.

Sońǵy jyldary Irannyń munaı mınıstrligi Parsy shyǵanaǵyndaǵy munaı ken oryndaryn óńdeýge basa nazar aýdaryp keldi, alaıda sanktsııalardy joıý jáne sheteldik kompanııalardyń qatysýyna kómektesýdi eskere otyryp, mınıstrlik qajetti qarjylyq qor men teńiz tereńdigindegi ken oryndaryn burǵylaýǵa arnalǵan tehnologııalardy ıgerý úshin Kaspıı teńizindegi munaı ken oryndaryn óńdeýdi kún tártibine qoıdy.

Hodafarın sondaı-aq, KEPCO-nyń ınvestıtsııalyq komıteti qurylǵandyǵyn habarlap, atalǵan komıtettiń Kaspıı teńizindegi ken oryndaryn óńdeý boıynsha josparlardy júzege asyrýǵa kapıtal jáne tehnologııalar tabýǵa mindetti ekendigin aıtty.

Buǵan deıin Iran munaı kompanııasynyń basqarýshy dırektory Hazar Mohsen Delavız Reseıdiń munaı kompanııasy «Lýkoılmen» jaqyn arada Kaspıı teńizindegi ken oryndaryn zertteý boıynsha kelisimder jasalýy múmkin ekendigin jasyrmady.

Onyń aıtýynsha, kelisimge sáıkes, taraptar Kaspııdiń ońtústik bóligindegi munaı ken oryndaryn zertteý boıynsha birlesip jumys isteıtin bolady. Qazirgi ýaqytta Kaspıı teńiziniń ońtústik bóligindegi Sardar Djangal ken ornynyń 2500 m tereńdiginen munaı qory tabylyp otyr.