Iran Izraılmen qaqtyǵys kezinde 21 myń adam ustalǵanyn habarlady
ASTANA.KAZINFORM — Iran maýsym aıyndaǵy Izraılmen qaqtyǵys kezindegi jappaı tutqyndaýlar týraly alǵashqy esebin jarııalady, dep habarlaıdy Kazinform tilshisi.
Maýsym aıynda Izraılmen bolǵan 12 kúndik qaqtyǵys kezinde Iran polıtsııasy 21 myńnan astam adamdy, onyń ishinde tyńshylyq jasady, zańsyz túsirilim jasady jáne ımmıgratsııalyq zańnamany buzdy degen kúdikpen ustaǵan. Bul týraly ırandyq BAQ habarlady.
Iran polıtsııasynyń baspasóz hatshysy Saıd Montazeralmahdı tutqyndaýlar Izraıldiń el aýmaǵyna áýe shabýyldary bastalǵannan keıin engizilgen kúsheıtilgen ishki qaýipsizdik sharalarynyń bir bóligi ekenin aıtty.
— 12 kúnge sozylǵan qaqtyǵys kezinde 21 myń kúdiktiniń ustalýy halyqtyń habardarlyǵy men qaýipsizdikti qamtamasyz etýge qatysýynyń joǵary deńgeıin kórsetedi, — dedi ol.
Kúdikti tulǵalar týraly aqparatty turǵyndar bergen.
Polıtsııanyń málimetinshe, ustalǵandardyń 260-tan astamy tyńshylyq jasady, 172-si ruqsatsyz túsirilim jasady, 2774-i elde zańsyz júrdi degen kúdikke ilingen.
Qaqtyǵys kezinde 1000-nan astam qosymsha baqylaý beketteri ornalastyryldy. Quqyq qorǵaý organdary sondaı-aq ustalǵandardyń mobıldi qurylǵylaryn tekserý kezinde qaýipsizdikke qaýip tóndiretin 30 erekshe jaǵdaı anyqtalǵanyn habarlady.
Polıtsııa ókili bul derekter qaqtyǵys kezindegi jappaı ustaý nátıjeleriniń alǵashqy resmı qorytyndysy ekenin atap ótti.
Buǵan deıin Irannyń sot júıesiniń basshysy Golamhosseın Mohsenı Edjeı dál osy kúni 2 myńǵa jýyq adam tutqynǵa alynǵanyn habarlap, onyń mańyzdy bóligi keıin qylmystyń dáleli bolmaǵandyqtan bosatylǵanyn atap kórsetti.
Aıta ketelik Iran men Ázerbaıjan ortaq shekaralyq jobalardy júzege asyrýdy jedeldetpek.