Iran Izraılge qarsy zymyran soqqylarynyń jańa legin bastady
ASTANA. KAZINFORM — Batys aqparat agenttikteriniń Iran telearnasyna silteme jasap habarlaýynsha, Tegeran Izraılge qaraı jańa zymyran soqqylarynyń legin iske qosty, dep jazady BBC.
Sonymen qatar, Izraıl Qorǵanys armııasy (TsAHAL) el aýmaǵyna qaraı ushyp kele jatqan zymyrandardy anyqtaǵanyn jáne áýe shabýylyna qarsy qorǵanys júıesi iske qosylǵanyn málimdedi. Azamattarǵa panalaý oryndaryna túsý jáne qosymsha buıryqtar bolǵansha sol jerde qalý týraly eskertý jasaldy.
Keıin TsAHAL Iran tarapynan «birneshe ondaǵan zymyran» atylǵanyn naqtylady.
– Olardyń keıbiri qaǵylyp, joıyldy. Qazirgi ýaqytta qutqarý qyzmetteri snarıadtar túsýi múmkin eldi mekenderde jumys júrgizip jatyr, – dedi Izraıl áskerı ókilderi.
Jumaǵa qaraǵan túni IRNA aqparat agenttigi ırandyq zymyrandardyń Tel-Avıv ortalyǵyna jetkenin habarlady.
TsAHAL-dyń baǵalaýynsha, buǵan deıingi shabýyldar kezinde Iran Izraılge 100-ge jetpeıtin zymyran atqan.