Iran Izraıldiń Lıvanǵa jasaǵan soqqylarynan soń Ormýz buǵazyn qaıta japty
ASTANA. KAZINFORM – Izraıldiń Lıvandaǵy «Hezbolla» uıymyna qarsy aýqymdy áýe soqqylarynan keıin, Tegeran Vashıngtonmen jasalǵan kelisimge qaramastan Ormýz buǵazyn qaıta japty. Bul týraly memlekettik BAQ habarlady, dep habarlaıdy Euronews.
BAQ málimetinshe, buǵazdyń jabylýy Tegeran men Vashıngton arasyndaǵy eki aptalyq bitim kúshine engen kúni oryn alǵan. Atalǵan kelisim bir aıdan astam ýaqytqa sozylǵan qaqtyǵystardy toqtatýǵa baǵyttalǵan edi.
Irannyń Islam revolıýtsııasy saqshylary korpýsymen (KSIR) baılanysty Fars agenttigi sársenbi kúni buǵan deıin eki munaı tankeri Irannyń ruqsatymen buǵaz arqyly ótkenin, alaıda keıinnen keme qozǵalysy tolyq toqtatylǵanyn málimdedi.
Bitim sharttarynyń negizgi tarmaqtarynyń biri – Irannyń Ormýz buǵazy arqyly keme qatynasyn qaıta jandandyrýǵa kelisim berýi bolǵan. Bul sheshim álemdik naryqta munaı men gaz jetkizilimindegi irkilisterdi azaıtyp, baǵanyń turaqtanýyna yqpal etýi tıis edi.
AQSh prezıdenti Donald Tramp pen Izraıl premer-mınıstri Bınıamın Netanıahý bitim kelisimi Lıvandy qamtymaıtynyn málimdedi. Alaıda kelissózderge deldal bolǵan Pákistan bul málimdemeni joqqa shyǵardy.
Lıvannyń Densaýlyq saqtaý mınıstrligi Izraıldiń áýe soqqylary saldarynan keminde 112 adamnyń qaza taýyp, 837 adamnyń jaralanǵanyn habarlady.
«Izraıl áskerı kúshteriniń Lıvannyń kóptegen aýdandaryna, onyń ishinde astanasy Beırýtqa jasaǵan áýe soqqylary 112 adamnyń qaza tabýyna jáne 837 adamnyń jaraqat alýyna ákeldi», – delingen vedomstvo málimdemesinde.
Izraıl áskerı kúshteri bul operatsııany qazirgi soǵys aıasyndaǵy eń iri úılestirilgen soqqy dep atady. Olardyń málimetinshe, nebári 10 mınýt ishinde Beırýtta, Lıvannyń ońtústiginde jáne Bekaa ańǵarynyń shyǵys bóliginde «Hezbolla» uıymynyń 100-den astam nysanyna soqqy jasalǵan.
Áskerılerdiń aıtýynsha, shabýyldar zymyran ushyrý qondyrǵylaryna, basqarý ortalyqtaryna jáne barlaý ınfraqurylymyna baǵyttalǵan. Sonymen qatar olar «Hezbollany» beıbit turǵyndardy «tiri qalqan» retinde paıdalandy dep aıyptady.
«Lıvan memleketi men onyń halqy «Hezbollanyń» azamattyq aımaqtarda ornyǵýyna jáne qarý-jaraq áleýetin arttyrýyna jol bermeýi tıis», – delingen Izraıl áskeriniń málimdemesinde.
Euronews atap ótkendeı, Izraıl 2 naýryzdan beri jalǵasyp jatqan sońǵy qaqtyǵys kezeńinde Beırýttyń ortalyq bóligine sırek soqqy jasaǵanymen, eldiń ońtústik jáne shyǵys óńirlerine, sondaı-aq astananyń ońtústik mańyna júıeli túrde shabýyl jasap keledi.
Jańa soqqylar bastalar aldynda «Hezbolla» ókilderiniń biri toptyń Lıvanda bitim ornatýǵa deldaldarǵa múmkindik berip otyrǵanyn, alaıda «ızraıldik tarap ony saqtamaı otyrǵandyqtan, resmı túrde bitimdi qoldaıtynyn jarııalamaıtynyn» málimdedi.
Aıta keteıik, Iran AQSh-pen arada jasalǵan bitimge qaramastan Parsy shyǵanaǵy elderin atqylap jatyr.
