Iran Izraıldiń aspanyn tolyq baqylaýǵa alǵanyn málimdedi

ASTANA. KAZINFORM — Irannyń Islam revolıýtsııasy saqshylary korpýsy (IRGC nemese KSIR) Tel-Avıvtiń keıbir bólikterindegi turǵyndardy evakýatsııalaýǵa shaqyryp, eskertý jarııalady. Bul týraly Kazinform agenttigi BBC-ge silteme jasap habarlady.

Oǵan deıin uqsas eskertý Iran turǵyndaryna da jasalǵan bolatyn – bul joly Izraıl armııasy áleýmettik jeliler arqyly Tegerannyń bir aýdanyndaǵy áskerı nysandarǵa soqqy jasalatynyn habarlaǵan.

KSIR sonymen qatar Izraıldiń áýe keńistigin tolyq baqylaýǵa alǵanyn málimdedi.

Irannyń bul málimdemesine sebep – Izraılge jasalǵan sońǵy zymyran soqqysy. KSIR ókilderiniń aıtýynsha, bul shabýyl olardyń Izraıl aspanyn baqylaýǵa alǵanyn dáleldeıdi.

Izraıl Qorǵanys armııasy túngi ýaqytta Iran tarapynan shamamen 25 zymyran eki kezeńde bir saǵat ishinde atylǵanyn habarlady. Bul shabýyldyń naqty saldary týraly aqparat jarııalanǵan joq. Izraıldik medıtsınalyq qyzmet ókilderi jaraqat alǵandar boıynsha shaqyrtýlar túspegenin málimdegen.

Aıta keteıik, Iran Izraılge taǵy birneshe zymyran jiberdi.

Ulybrıtanııanyń syrtqy barlaý qyzmeti — MI6-tyń burynǵy basshysy Djon Soıers BBC-ge bergen suhbatynda Izraıl Irandaǵy keıbir asa mańyzdy ıadrolyq nysandarǵa shabýyl jasamaǵanyn, óıtkeni olar tereń jerasty bekinisterinde ornalasqanyn aıtty.

Eýropalyq dıplomatııa basshysy Kaıa Kallas AQSh-tyń aralasýy Taıaý Shyǵystaǵy qaqtyǵystyń órshýine ákeletinin aıtty.