Iran Izraıl soqqysynan joǵary áskerı qolbasshylary men jetekshi ǵalymdary qaza tapqanyn rastady

ASTANA. KAZINFORM - Iran bıligi Izraıldiń Tegeranǵa jáne eldiń basqa aımaqtaryna túnde jasaǵan soqqylarynan birqatar negizgi áskerı jáne azamattyq qyzmetkerlerdiń qaza tapqanyn resmı túrde rastady, dep habarlaıdy Kazinform tilshisi.

Qaza tapqandar arasynda Iran Qarýly kúshteri Bas shtabynyń basshysy general-maıor Mohammad Bagerı, Islam revolıýtsııasy Saqshylar korpýsynyń qolbasshysy general-maıor Hoseın Salamı jáne Hatam ál-Anbııa shtabynyń qolbasshysy general-maıor Golıamalı Rashıd bar. Olardyń jekelegen áýe shabýyldary kezinde qaza tapqanyn IRNA memlekettik aqparat agenttigi rastady.

Sondaı-aq qaza tapqandar arasynda eki kórnekti ırandyq ıadrolyq ǵalym: Islam Azad ýnıversıtetiniń prezıdenti Mohammad-Mehdı Tehranchı jáne Iran Atom energııasy uıymynyń burynǵy basshysy Fereıdýn Abbası bar. Olar Tegerannyń turǵyn aýdandaryna baǵyttalǵan soqqylardan qaza tapqany habarlandy.

Irannyń memlekettik telearnasy shabýylda rýhanı kósem Aıatolla Álı Hameneıdiń keńesshisi Álı Shamhanıdiń de jaralanǵanyn habarlady.

— Búgingi sıonıstik rejımniń shabýylynan joǵary mártebeli jetekshiniń keńesshisi Álı Shamhanı jaralandy, - delingen málimdemede.

Izraıl jumaǵa qaraǵan túni Tegeran men basqa qalalardaǵy nysandardy soqqyǵa jyqqan jappaı shabýyldar serııasyn jasady.

IRNA habarlaǵandaı, nysanalardyń qatarynda turǵyn aýdandar da boldy. Memlekettik telearna tilshileri úıindiler arasynan áıelder men balalardyń múrdesi tabylǵanyn habarlady.

— Qolbasshylyq pen ǵalymdardyń qazasy Iran áskeri de, halqy da keshirmeıtin shyǵyn. Munyń saldaryn Izraıl kóteredi, — dedi Iran qaýipsizdik kúshteri.

Iran úkimetiniń resmı ókili bul eldiń soqqylardy tikeleı basqynshylyq áreketi dep sanaıtynyn jáne oǵan «jan-jaqty jáne proportsıonaldy emes» jaýap ázirlep jatqanyn atap ótti. Áýe shabýylyna qarsy qorǵanys júıeleri tolyq daıyndyqta, elde ulttyq aza tutý jarııalandy.

Halyqaralyq uıymdar men birqatar memleketter sabyrǵa shaqyrdy. BUU Bas hatshysy Antonıý Gýterrısh shıelenisti dereý toqtatýǵa jáne aýqymdy aımaqtyq qaqtyǵysty boldyrmaýǵa shaqyrdy.

Aıta keteıik, juma kúni túnde Izraıl Iran aýmaǵyna jappaı soqqy berdi. Buǵan jaýap retinde Tegeran Izraılge qaraı júzden astam dron ushyrdy.

Sondaı-aq, Izraıldiń Iranǵa soqqy berýinen keıin munaı baǵasy kúrt kóterildi.