Iran Izraıl shabýylynan keıin Ormýz buǵazyn jabaıyn dep jatyr
ASTANA. KAZINFORM - Iran Izraıldiń shabýylynan keıin Ormýz buǵazyn jabý máselesin qarastyryp jatyr. Bul týraly Iran parlamentiniń ulttyq qaýipsizdik jáne syrtqy saıasat jónindegi komıtetiniń múshesi Ismaıl Kosarı málimdedi, dep habarlaıdy TASS.
- Ormýz buǵazyn jabý máselesi qazir qarastyrylyp jatyr jáne Iran tıisti sheshim qabyldaýdan tartynbaıdy, - dep keltiredi onyń sózin ırandyq Rokna portaly.
Suıytylǵan tabıǵı gazdyń álemdik jetkiziliminiń 30%-na deıin jáne munaı men munaı ónimderiniń jahandyq eksportynyń 20%-na deıin Ormýz buǵazy arqyly ótedi. Iran bıligi buǵan deıin ulttyq qaýipsizdikke qaýip tóngen jaǵdaıda Ormýz buǵazynda keme qatynasyn shekteı alatynyn birneshe ret eskertken.
Eske sala keteıik, juma, 13 maýsymǵa qaraǵan túni Izraıl Iranǵa jappaı soqqy berdi. Buǵan jaýap retinde Tegeran Izraılge qaraı júzden astam dron ushyrdy. Iran Natanzedegi ıadrolyq qondyrǵynyń zaqymdanǵanyn rastady, biraq radıatsııanyń aǵyp ketkenin joqqa shyǵardy.
Iran Izraılge zymyran soqqylarynyń jańa tolqynyn bastady. Izraıldiń Tótenshe jaǵdaılar qyzmeti habarlaǵandaı, ırandyq zymyran atysynan eki adam qaza tapty – shamamen 60 jastaǵy áıel jáne 45 jastaǵy er adam. Taǵy 19 adam jaraqat aldy, dep habarlady Izraıldiń jedel járdem qyzmeti.
Irannyń BUU-daǵy ókili Izraıldiń áýe shabýyly saldarynan 78 adamnyń qaza tapqanyn aıtqan bolatyn. Iranda 320-dan astam adam jaraqat aldy.
Buǵan deıin Iran joǵary shendi áskerı qolbasshylar men jetekshi ǵalymdardyń Izraıl soqqysy saldarynan qaza tapqanyn rastady.