Iran-Izraıl qaqtyǵysynan keıin 500-ge jýyq ázerbaıjandyq elshilikke júgindi

ASTANA. KAZINFORM — Ázerbaıjan azamattarynan Irandaǵy elshilik pen Tebrızdegi bas konsýldyqqa 500-ge jýyq ótinish kelip tústi, dep jazady AZERTADJ.

Izraıl men Iran arasyndaǵy qaqtyǵysqa baılanysty Ázerbaıjannyń Izraıl memleketindegi jáne Iran Islam Respýblıkasyndaǵy elshilikterinde, sondaı-aq Tebrız qalasyndaǵy bas konsýldyǵynda ashylǵan «jedel jelige» kelip túsken ótinishter kún saıyn qaralyp jatyr. Bul týraly Ázerbaıjan Respýblıkasy Syrtqy ister mınıstrliginiń resmı ókili Aıhan Gadjızade málim etti.

Onyń aıtýynsha, Irannan shyǵýǵa nıetti Ázerbaıjan jáne ózge elderdiń azamattaryna qurlyq arqyly ótýge qajetti ruqsat alý sharalary jalǵasyp jatyr. Al Izraıldegi Ázerbaıjan azamattary kórshiles Mysyr men Iordanııaǵa jóneltilýde.

Aıhan Gadjızadeniń málimetinshe, qazirgi ýaqytqa deıin Irandaǵy elshilik pen Tebrızdegi bas konsýldyqqa Ázerbaıjan azamattarynan jalpy 500-ge jýyq ótinish kelip túsken. Olardyń ishinde 60-tan astam adam shekaradan ótip úlgerdi. Budan bólek, 51 eldiń 1200-den astam azamatynyń ótinishi qaralyp jatyr.

— Izraılden Iordanııaǵa ótý úshin 34 azamatymyzǵa qatysty tıisti sharalar qabyldandy, — dedi SІM resmı ókili.

Buǵan deıin habarlanǵandaı, Ázerbaıjan shekarasy arqyly Irannan 6 qazaqstandyq evakýatsııalandy.