Iran-Izraıl qaqtyǵysy Qazaqstan ekonomıkasyna qalaı áser etip jatyr
ASTANA. KAZINFORM — Ulttyq bank tóraǵasy Tımýr Súleımenov Senat otyrysynan keıin BAQ ókilderine Taıaý Shyǵystaǵy shıelenister Qazaqstan ekonomıkasyna qalaı áser etetini týraly paıymyn aıtty.
— Qazirgi tańda munaı baǵasy osy shıelenis saldarynan ósip jatqanyn kórip otyrsyzdar. Brent markaly munaıdyń bir barreli 76-77 dollardyń shamasynda tur. Biz munaı eksporttaıtyn el bolǵandyqtan, bıýdjetimizge, jalpy eksportymyzǵa jaqsy jaǵdaı týǵyzyp otyr. Biraq bul qubylmaly. Osy baǵa turaqty bola ma, turaqsyz bola ma, eshkim bilmeıdi. Sondyqtan dál osy sátte ekonomıkamyzǵa jaqsy, — dedi ol.
Ulttyq bank basshysy Iran-Izraıl qaqtyǵysynyń makroekonomıkadaǵy áserin naqty aıtýǵa áli erte ekenin atap ótti.
— Bul jerde men ekonomıkalyq áserin aıtyp turmyn. Munaı baǵasy óskennen keıin Ulttyq qor men bıýdjetke túsetin túsimderdiń mólsheri de artady, — dedi Tımýr Súıleımenov.
Eske salsaq, keshe Taıaý Shyǵystaǵy qaqtyǵys: Iran aýmaǵynan 109 qazaqstandyq elge oraldy.