Iran Iraktyń munaı tankerlerine Ormýz buǵazy arqyly ótýge ruqsat berdi
ASTANA. KAZINFORM — Tegeran teńiz qatynasyna qoıylǵan shekteýler saqtalyp otyrǵan tusta Iraktyń birqatar munaı tankerine Ormýz buǵazy arqyly ótýge arnaıy ruqsat berdi, dep habarlaıdy Kazinform agenttiginiń menshikti tilshisi.
Iran Baǵdadtyń Irak munaıyn osy teńiz joly arqyly eksporttaýdy qamtamasyz etý týraly birneshe ret jasaǵan ótinishinen keıin Iraktyń birneshe munaı tankeriniń Ormýz buǵazy arqyly ótýine ruqsat berdi. Bul týraly IRNA agenttigi habarlady.
Irak tankerlerine arnaıy ruqsat berý máselesi Iran parlamentiniń tóraǵasy Muhammed Bager Galıbaftyń Irakqa jaqynda jasaǵan sapary kezinde Baǵdad kótergen negizgi máselelerdiń biri boldy.
Irak tarapy eldiń erekshe jaǵdaıyn jáne munaı eksportynyń Ormýz buǵazy arqyly ótetin teńiz jolyna táýeldi ekenin eskerýdi suraǵan.
Agenttik málimetinshe, Iran sońǵy alty aıda da jekelegen Irak tankerlerine buǵaz arqyly ótýge ruqsat bergen. Buǵan deıin Irannyń syrtqy ister mınıstri Abbas Aragchı Qytaı, Reseı jáne Pákistan kemelerine de qaýipsiz ótý múmkindigi usynylǵanyn málimdegen.
Iran grants permission for a number of Iraqi oil tankers to pass through Hormuz https://t.co/HpA8sb2gwX https://t.co/HpA8sb2gwX
— Reuters (@Reuters) August 22, 2026
Qaqtyǵys bastalǵanǵa deıin Irak táýligine shamamen 3,5 mln barrel munaı eksporttaǵan. Onyń 3,3 mln barrelden astamy Basradan jóneltilip, Ormýz buǵazy arqyly tasymaldanǵan. Eldiń jyldyq bıýdjetiniń shamamen 90 paıyzy munaı eksportynan túsetin kiriske táýeldi.
Naýryzdan maýsymǵa deıin Iraktyń munaı eksporty 85 paıyzdan astamǵa qysqardy. Al aı saıynǵy munaıdan túsetin kiris shamamen 7 mlrd dollardan 1,5 mlrd dollardan tómen deńgeıge tústi.
Shilde aıynda Irak ońtústiktegi termınaldar arqyly shamamen 35,5 mln barrel munaı eksporttady. Bul daǵdarysqa deıingi deńgeıdiń shamamen úshten birine teń.
Baǵdad sondaı-aq munaı eksportyn Túrkııanyń Djeıhan porty, Sırııanyń Banııas porty jáne Iordanııanyń Akaba porty arqyly júzege asyratyn balama baǵyttardy keńeıtý jumystaryn júrgizip jatyr. Alaıda Irak munaıynyń basym bóligi eldiń ońtústiginde óndiriledi, al qazirgi ınfraqurylym Ormýz buǵazy arqyly ótetin baǵytty tolyq almastyrýǵa múmkindik bermeıdi.
Buǵan deıin Irak ońtústiktegi munaı óndirý kólemin táýligine 3 mln barrelge deıin qalpyna keltirýdi josparlap otyrǵanyn habarlandy
Kóktemde Irak Ormýz buǵazyn aınalyp ótip, Sırııa arqyly munaı eksporttaýdy bastady. Sondaı-aq 13 jylǵa jýyq ýaqyt jabyq bolǵan Sırııamen aradaǵy negizgi qurlyqtyq baǵytty qaıta iske qosty.
