Iran Harg aralyndaǵy qorǵanysty kúsheıtti
ASTANA. KAZINFORM – Iran Parsy shyǵanaǵyndaǵy Harg aralynda áskerı kúshter men qorǵanys júıesin kúsheıtip jatyr. Bul AQSh tarapynan bolýy múmkin operatsııa týraly qaýiptiń kúsheıýimen baılanysty, dep habarlaıdy Kazinform agenttiginiń menshikti tilshisi.
CNN telearnasynyń amerıkalyq barlaý derekterine silteme jasap habarlaýynsha, Tegeran aralǵa qosymsha áskerı kúsh jiberip, áýe shabýylyna qarsy qorǵanys quraldaryn ornalastyryp, qorǵanys shepterin daıyndap jatyr. Sondaı-aq yqtımal shabýyl jaǵdaıyna arnalǵan tosqaýyldar men ınjenerlik bógetter ázirlenýde.
Buǵan deıin AQSh prezıdenti Donald Tramp Iranǵa qysymdy kúsheıtý jáne Ormýz buǵazyn ashýǵa májbúrleý úshin Harg aralyn baqylaýǵa alý nusqasyn qarastyryp otyrǵany týraly aqparat taraǵan.
Amerıkalyq áskerı sarapshylar mundaı operatsııa úlken shyǵynǵa ákelýi múmkin ekenin aıtady. Olardyń pikirinshe, aral jaqsy bekinispen qorǵalǵan jáne qosymsha zenıttik keshendermen kúsheıtilgen.
Sońǵy málimetter boıynsha, AQSh óńirge 82-áýe-desant dıvızııasynyń shamamen 1000 áskerı qyzmetkerin jáne 5000-ǵa jýyq teńiz jaıaý áskerin jibergen. Olardyń bir bóligi USS Tripoli desanttyq kemesimen jetkizilip jatyr. Sarapshylar bul keme yqtımal operatsııada negizgi ról atqarýy múmkin ekenin aıtady.
Iran parlamentiniń tóraǵasy Muhammad Baǵer Kalıbaf el mundaı stsenarııge daıyndalyp jatqanyn málimdedi.
– Bizdiń kúshter qarsy taraptyń barlyq qozǵalysyn baqylaýda ustap otyr. Eger shabýyl jasalsa, ómirlik mańyzy bar nysandarǵa úzdiksiz soqqy beriledi, – dedi ol.
Harg araly Iran jaǵalaýynan shamamen 30 shaqyrym qashyqtyqta ornalasqan jáne el munaı eksportynyń negizgi toraby sanalady. Sarapshylardyń málimetinshe, Iran eksporttaıtyn munaıdyń shamamen 90 paıyzy osy aral arqyly jóneltiledi.
Aral aýmaǵynda iri munaı qoımalary, qubyr jelileri jáne teńiz termınaldary ornalasqan. Munda bir mezette ondaǵan mıllıon barrel munaı saqtaýǵa múmkindik bar. Tereń sý aılaǵy iri tankerlerdi qabyldaýǵa jaǵdaı jasaıtyndyqtan, Harg Iran ekonomıkasy úshin strategııalyq mańyzy bar nysan bolyp sanalady.
Aıta keteıik, AQSh pen Izraıl Irandaǵy «Býsher» AES aýmaǵyna taǵy soqqy jasady.