Iran halqy prezıdenttiń qaıǵyly qazasyna baılanysty bes kún aza tutady
ASTANA. KAZINFORM — Irannyń rýhanı kósemi aıatolla Seıed Álı Hameneı Irannyń prezıdenti Ibrahım Raısı men onyń qasyndaǵylardyń eldiń soltústik-batysynda tikushaq apatynan qaza bolýyna baılanysty bes kúndik jalpyhalyqtyq aza tutý jarııalady, dep habarlaıdy IRNA aqparat agenttigi.
Aıatolla Hameneı dúısenbi kúni tańerteń taratqan joldaýynda ótken kúni Irannyń Shyǵys Ázerbaıjan provıntsııasynda bolǵan oqıǵada prezıdent Raısıdiń qaıtys bolýyna baılanysty qatty qaıǵyrdy.
Joldaýda Joǵarǵy kóshbasshy Raısıdi ómirin Iran halqyna, eline jáne ıslamǵa qyzmet etýge arnaǵan eńbekqor dinbasy jáne tanymal prezıdent dep sıpattady.
«Bul qaıǵyly oqıǵada Iran halqy júregi keń, kishipeıil jáne qundy qyzmetshisinen aıyryldy», — dedi aıatolla Hameneı.
Ol sondaı-aq prezıdent Raısı qaskóılerdiń synyna qaramastan, Iran halqy úshin táýlik boıy qajyrly jumysyn toqtatpaǵanyn qosyp ótti.
Ol Iran halqyna kóńil aıtyp, vıtse-prezıdent Mohammad Mohberge ýaqytsha prezıdent qyzmetin atqarýǵa jáne Iran parlamenti men sot júıesiniń basshylarymen aldaǵy 50 kún ishinde jańa prezıdentti saılaýǵa jol ashýǵa ruqsat berdi.
Aıatolla Hameneı sondaı-aq Shyǵys Ázerbaıjanda tikushaq apaty kezinde prezıdent Raısımen birge bolǵan basqa joǵary laýazymdy tulǵalardyń, sonyń ishinde Syrtqy ister mınıstri Hoseın Amır Abdollahııan, Joǵarǵy Kóshbasshynyń ókili jáne Tebrız juma namazynyń ımamy Seıed Mohammed Álı ál-Hashemı, Shyǵys Ázerbaıjan gýbernatory Malek Rahmatıdiń qazasyna baılanysty kóńil aıtty.
Eske sala ketsek, 19 mamyr, jeksenbi kúni Shyǵys Ázerbaıjannyń Varzakan aımaǵyndaǵy Tebrız qalasyna ushyp bara jatyp apatqa ushyraǵan Iran Islam Respýblıkasynyń segizinshi prezıdenti Aıatolla Seıed Ibrahım Raısı qasyndaǵy resmı tulǵalarmen birge kóz jumdy.
Iran prezıdenti mingen tikushaq Ázerbaıjanmen shekaralas Verzegan qalasyna jaqyn jerge apatty jaǵdaıda qondy.
Keıinirek Iran vıtse-prezıdenti Mohsen Mansýrı Ibrahım Raısı mingen tikushaq apatty jaǵdaıda qonǵannan keıin qasyndaǵy eki adam birneshe ret baılanysqa shyqqanyn aıtty.
Túrkııa oqıǵa ornyna 32 alpınıst pen tikushaq jiberdi.
Eýropalyq keńes tóraǵasy Sharl Mıshel Iran prezıdenti Ibrahımı Raısıge qatysty jaǵdaı týraly málimdeme jasady.
Reseı prezıdenti Vladımır Pýtın apatty jaǵdaıda qonǵan Iran prezıdenti Ibrahım Raısı mingen tikushaqty izdeýge kómektesý úshin 50 qutqarýshy, eki ushaq pen tikushaq jiberýge buıryq berdi.
