Iran Gaza sektoryndaǵy qaqtyǵystarǵa qashan aralasýy múmkin – Elshiniń jaýaby
Iran Islam Respbýlıkasynyń Qazaqstandaǵy Tótenshe jáne ókiletti elshisi Álı Akbar Djoýkar BAQ ókilderine bergen suhbatynda resmı Tehrannyń Gaza sektoryndaǵy qaqtyǵystarǵa qashan aralasýy múmkin aıtty, dep habarlaıdy Kazinform.
«Iran Gaza sektoryndaǵy qarýly qaqtyǵystarǵa qandaı jaǵdaıda aralasady degen suraqqa kelsek, men ony naqty bilmeımin. Óıtkeni bizdiń jetekshilerimiz, bizdiń basshylarymyz osy oqıǵaǵa baılanysty óz ustanymdaryn jarııalady. Bul qatygezdik, bul agressııa jalǵasa beretin bolsa, buǵan búkil álemniń musylmandary reaktsııa bildirýi múmkin. Ózderińiz kórip otyrsyzdar, bul máselede ıslam elderi ózderiniń birligin kórsetip, biryńǵaı, uqsas ustanym tanytty», - dedi elshi.
Sondaı-aq dıplomat Iran bul máselede HAMAS uıymyn terrorshylar uıymy emes, palestın jerin basqynshylardan qorǵaýshy dep esepteıtinin málim etti.
«Iran ózi aıtty, «Basqynshylyqqa qarsylyq bildirip jatqan toptardy qoldaımyz», - dedi. Ásirese, sonyń ishinde HAMAS tobynyń áreketterin qoldaıtynyn bildirdi. Irannyń dinı kósemi osynaý basqynshylyqqa qarsy kúresetin ár jaýyngerdiń qolyn súıýge ázir ekenin aıtty», - dedi Álı Akbar Djoýkar.
Elshiniń sózinshe, Iran HAMAS-qa áskerı kómek bergennen góri qantógisti toqtatý baǵytynda jumys istegendi jón kórip otyr.
«Palestınanyń qarsylyq kórsetýshi toptary áli kúresip jatyr. Iran ondaǵy zombylyqty toqtatýǵa kúsh salady. 12 kúnniń ishinde bolǵan shabýyldar jer sharyndaǵy ár adamnyń júregin shaılyqtyryp otyr. Álemniń ár túkpirinen osy zombylyqtarǵa qarsy adamdar ún qatyp jatyr. Islam elderin aıtpaǵannyń ózinde Eýropada, Berlınde, Parıjde, Londonda qarsylyq sharalary ótti. Keshe bir top evreı AQSh Senatyna kirýge talpynys jasady. Beıbitsúıgish adamdar ar-uıatyna qulaq asyp, zombylyqty toqtatýǵa shaqyryp jatyr. Qorǵanysh izdep, aýrýhanany panalaǵan adamdardyń óltirilýin qalaı túsinýge bolady?! Elderdiń bári áskerı qylmys jasalyp jatqanyn kórip otyr. Ol jerde qazir sý berilmeıdi, elektr qýaty da joq. Onyń bárin álemnen jasyrý múmkin emes. Sondyqtan Iran zombylyqty toqtaýǵa kúsh salady», - dedi Álı Ákbar Djoýkar.
