Iran ǵalymdary súıek tininiń qalpyna kelýin jedeldetetin tehnologııa ázirledi
ASTANA. KAZINFORM — Irandyq ǵalymdar diń jasýshalarynyń súıek jasýshalaryna aınalýyn jedeldetetin materıaldar ázirledi. Zerthanalyq tájirıbe barysynda súıek tininiń qalyptasa bastaǵan alǵashqy belgileri nebári 7 kúnde baıqalǵan, dep habarlaıdy BelTA.
Jańa tehnologııany regeneratıvti medıtsınada, kúrdeli súıek synyqtaryn emdeýde, sondaı-aq jaraqattan nemese aýrýdan zaqymdanǵan súıekterdi qalpyna keltirýde qoldanýǵa bolady.
Zertteýshiler tabıǵı súıek tininiń eki negizgi qasıetin qaıtalaıtyn jasandy materıaldar jasaǵan. Onyń birinshisi — súıek túzetin jasýshalardyń betki qabatynyń erekshe qurylymy. Ekinshisi — súıek tininiń mehanıkalyq áserge jaýap retinde elektrlik sıgnal týdyrý qabileti. Bul qubylys pezoelektrlik áser dep atalady.
Jańa materıaldardy jasaý úshin súıek jasýshalary betiniń úlgileri, barıı tıtanatynyń nanobólshekteri men polımer talshyqtary paıdalanylǵan. Osy komponentterden jasalǵan qurylymdar súıek tininiń qalyptasýyna qolaıly tabıǵı ortany qaıtalaıdy.
Ǵalymdar atalǵan materıaldarǵa maı tininen alynǵan diń jasýshalaryn ornalastyryp, olardyń ósýin baqylaǵan. Sonymen qatar jasýshalarǵa adam aǵzasyndaǵydaı mehanıkalyq kúsh túsirgen. Zertteý barysynda jasýshalardyń tirshiligin saqtaýy, kóbeıýi jáne súıek túzetin jasýshalarǵa aınalýy baǵalanǵan.
Tájirıbe nátıjesi jańa materıaldardyń jasýshalardyń tirshiligin saqtaýǵa qolaıly ekenin kórsetti. Sondaı-aq olardyń súıek túzetin jasýshalarǵa tán qasıetterdi ádettegiden jyldam qalyptastyratyny anyqtalǵan. Súıek tininiń túzile bastaǵan alǵashqy belgileri jeti kúnnen keıin baıqalǵan.
Tehnologııanyń basty ereksheligi — diń jasýshalarynyń súıek jasýshalaryna aınalýyna yqpal etetin eki fızıkalyq faktordy biriktirýinde. Bul úderiste hımııalyq yntalandyrǵyshtar qoldanylmaıdy.
Zertteýshilerdiń pikirinshe, jańa tásil emdeýge qajetti jasýshalardy daıyndaý shyǵynyn azaıtýǵa, úderistiń qaýipsizdigin arttyrýǵa jáne jasýshalardyń sapasyn saqtaýǵa múmkindik berýi múmkin.
Aıta keteıik, qazaq ǵalymy qaterli isikti emdeýdiń jańa tásilin ázirlep jatyr.
