Iran fýtboldan álem chempıonatyna qatysý úshin FIFA-ǵa 10 talap qoıdy
ASTANA. KAZINFORM – Iran fýtboldan jazda ótetin álem chempıonatyna qatysýǵa daıyn ekenin rastady. Alaıda ulttyq qurama tóńiregindegi shıelenistiń kúsheıýine baılanysty atalǵan el FIFA men týrnırdi qabyldaıtyn memleketterge birqatar talap qoıdy, dep habarlaıdy BBC.
Iran fýtbol federatsııasy (FFIRI) el quramasy týrnırge «óziniń senimi, mádenıeti men qundylyqtarynan eshqandaı bas tartýsyz» qatysatynyn málimdedi. Sonymen qatar qabyldaýshy elder Irannyń alańdaýshylyǵyn eskerýi tıis ekenin atap ótti.
Bul talaptar FFIRI prezıdenti Mehdı Tadjne ótken aıda FIFA kongresine qatysý úshin Kanadaǵa kirýge ruqsat berilmegennen keıin jarııa boldy. Keıin ol Iran tarapy maýsym aıynda AQSh, Meksıka jáne Kanadada ótetin álem chempıonatyna qatysty FIFA-ǵa 10 talap joldaǵanyn aıtty.
Talaptardyń qatarynda barlyq fýtbolshylarǵa, jattyqtyrýshylar men resmı tulǵalarǵa vıza berý kepildigi bar. Bul talap Islam revolıýtsııasy saqshylar korpýsynda (Islamic Revolutionary Guard Corps – IRGC) áskerı qyzmet ótkergen azamattarǵa da qatysty.
Kanada men AQSh IRGC uıymyn terrorıstik qurylym dep tanyǵan. Kanadanyń Mehdı Tadjdy elge kirgizbeýine de onyń atalǵan uıymmen baılanysy sebep bolǵany aıtyldy.
Iran sondaı-aq ulttyq quramaǵa qurmetpen qaraýǵa kepildik berýdi talap etip otyr. Onyń ishinde ánuran oryndalýy men memlekettik týdyń kóterilýi kezindegi hattamanyń saqtalýy, áýejaılar, qonaqúıler men stadıondardaǵy qaýipsizdiktiń kúsheıtilýi bar.
Talaptardyń bir bóligin FIFA oryndaýy múmkin. Ásirese týrnırdi uıymdastyrý men delegatsııalarǵa qatysty hattamalyq máseleler federatsııa quzyretine kiredi. Alaıda vıza men shekaralyq baqylaý máselesi AQSh bıliginiń quzyrynda qalady.
AQSh memlekettik hatshysy Marko Rýbıo ırandyq fýtbolshylardyń týrnırge qatysatynyn málimdedi. Biraq IRGC-men baılanysy bar tulǵalar AQSh-qa kirý kezinde shekteýlerge tap bolýy múmkin ekenin eskertti.
Bul jaǵdaı FIFA aldynda kúrdeli tańdaý týǵyzdy: bir jaǵynan, barlyq irikteýden ótken quramalardyń qatysýyn qamtamasyz etý qajet, ekinshi jaǵynan, Tegeran men Vashıngton arasyndaǵy saıası ahýaldy da eskerý kerek.
Eske salsaq, 28 aqpanda AQSh pen Izraıl Iranǵa aýqymdy soqqy jasady. Buǵan jaýap retinde Iran Izraıl men AQSh-tyń Parsy shyǵanaǵyndaǵy odaqtastaryna shabýyl jasady. Sodan beri áskerı qımyldar turaqsyz bitim aıasynda negizinen toqtatylǵan.
Iran tarapynyń keıbir ózge talaptaryn oryndaý da qıynǵa soǵýy múmkin. Atap aıtqanda, ırandyq resmı tulǵalar jýrnalısterden tek «fýtboldyń tehnıkalyq máselelerine» qatysty suraqtar qoıýdy suraǵan.
Alaıda Iran jaǵdaıynda fýtbol men saıasattyń ara-jigi anyq emes. Bul naýryz aıynda Aýstralııada ótken áıelder arasyndaǵy Azııa kýbogynda aıqyn kórindi. Birneshe ırandyq fýtbolshy saıası baspana suraýǵa áreket jasap, dıplomatııalyq janjal týyndaǵan.
Barlyq qaıshylyqtarǵa qaramastan, Irannyń týrnırden bas tartatynyn bildiretin naqty belgi ázirge joq. Qalyptasqan jaǵdaı FIFA, Tegeran jáne AQSh bıligi arasyndaǵy kelissózderdiń barǵan saıyn kúrdelene túsetinin kórsetip otyr.
Aıta keteıik, buǵan deıin FIFA Irannyń ChM-2026 týrnırine qatysatynyn rastaǵanyn jazdyq.
Sondaı-aq halyqaralyq fýtbol uıymy aýǵan bosqyndaryna da halyqaralyq týrnırde baq synaýǵa ruqsat berdi.
