Iran fýtbol quramasy álem chempıonatyna qatysý úshin AQSh vızasyna ótinish berdi
ASTANA. KAZINFORM – 2026 jylǵy fýtboldan álem chempıonatyna qatysatyn Iran ulttyq quramasy AQSh vızasyn alý úshin Ankaradaǵy elshilikke ótinish tapsyrdy, dep habarlaıdy Anadolu.
Fýtbolshylar AQSh, Kanada jáne Meksıkada ótetin álem chempıonatyna qatysý úshin vıza rásimdeýge kelgen.
Jýrnalıster elshilik ǵımaratynan shyqqan oıynshylardan vızalyq ótinish nátıjesi týraly suraǵanda, fýtbolshylar jymıyp jaýap bergen.
Iran quramasynyń oqý-jattyǵý jıyny 19 mamyrda Antalıada bastaldy.
Iran fýtbol federatsııasynyń birinshi vıtse-prezıdenti Mehdı Mohammad Nabı buǵan deıin komandanyń barlyq múshesi AQSh pen Kanada vızalaryn rásimdeý úshin Ankaraǵa baratynyn aıtqan bolatyn.
Onyń sózinshe, vızalyq jáne basqa da rásimderden ótý úshin quramanyń shetelde oınaıtyn keıbir fýtbolshylary da komandaǵa qosylady.
2026 jylǵy fýtboldan álem chempıonaty 11 maýsym men 19 shilde aralyǵynda AQSh, Kanada jáne Meksıkada ótedi.
Aıta keteıik, AQSh prezıdenti Donald Tramp 12 mamyr kúni Iran quramasynyń álem chempıonatyna qatysa alatynyn, alaıda qaýipsizdik turǵysynan muny durys sheshim dep sanamaıtynyn málimdegen edi.
Mamyrdyń ortasynda Iran fýtbol federatsııasynyń prezıdenti Mehdı Tadj 2026 jylǵy álem chempıonatynyń fınaldyq kezeńine ulttyq quramanyń qatyspaýy múmkin ekenin málimdegeni habarlandy.
