Iran energııa resýrstaryn eksporttaıtyn ózge baǵyttardy jabýy múmkin ekenin málimdedi
ASTANA.KAZINFORM — Iran AQSh pen onyń odaqtastary paıdalanatyn energııa eksport baǵyttaryn jabýy múmkin ekenin málimdedi, dep habarlaıdy Kazinform agenttiginiń menshikti tilshisi.
Irannyń Islam revolıýtsııasy saqshylar korpýsy (KSIR) AQSh pen onyń odaqtastary paıdalanatyn óńirlik energııa resýrstaryn eksporttaý baǵyttaryn jabýy múmkin ekenin málimdedi
KSIR málimdemesinde Ormýz buǵazy AQSh-tyń áskerı is-qımyldary toqtaǵanǵa deıin jabyq kúıinde qalatyny aıtylǵan.
– Óńirdegi energııa resýrstaryn eksporttaý baǵyttary ne barlyǵyna ashyq bolady, ne eshkimge qoljetimdi bolmaıdy, – delingen Irannyń IRNA agenttigi taratqan habarlamada.
KSIR AQSh áskerı-teńiz kúshteriniń Úndi muhıtyndaǵy áreketteri óńir munaıy men gazyna qoljetimdilikti shektegenin alǵa tartyp, jaýap retinde AQSh pen onyń seriktesteriniń múddesine qyzmet etetin ózge de eksporttyq dálizderdiń jabylýy múmkin ekenin eskertti.
IRGC: Last night, US' treacherous military dispatched its naval pirates to the Indian Ocean, ostensibly to control the Strait of Hormuz, effectively sealing off sea lanes and cutting global access to the region's oil and gas. pic.twitter.com/efhnLQk2NF
— IRNA News Agency ☫ (@IrnaEnglish) July 15, 2026
BAQ málimetinshe, bul málimdeme Qyzyl teńizdi Aden shyǵanaǵymen jalǵaıtyn Bab ál-Mandeb buǵazyndaǵy keme qatynasyna qaýip tónýi múmkin ekenin ańǵartady. Bul baǵyt arqyly Saýd Arabııasynyń munaıy jáne halyqaralyq teńiz tasymalynyń edáýir bóligi ótedi.
Buǵan deıin Iranmen odaqtas Iemendegi «Ansar Alla» qozǵalysynyń ókili Saýd Arabııasy Iemenge soqqylaryn jalǵastyrsa, Bab ál-Mandeb buǵazyn jabýǵa daıyn ekenin málimdegen bolatyn. Onyń aıtýynsha, mundaı qadam munaı baǵasyn barreline 200 dollarǵa deıin kóterýi múmkin.
KSIR málimdemesi AQSh-tyń Ormýz buǵazy mańyndaǵy jáne Iran jaǵalaýyndaǵy áskerı nysandarǵa jasaǵan jańa soqqylarynan keıin jarııalandy. AQSh Ortalyq qolbasshylyǵy operatsııa shamamen jeti saǵatqa sozylyp, Irannyń kommertsııalyq kemelerge shabýyl jasaý múmkindigin álsiretýge baǵyttalǵanyn habarlady.
— U.S. Central Command (@CENTCOM) July 15, 2026
Iran bıliginiń málimetinshe, sońǵy amerıkalyq soqqylar saldarynan eldiń ońtústiginde keminde 30 beıbit turǵyn qaza tapqan. Sondaı-aq Bampýr áskerı bazasyna jasalǵan shabýyldan jeti áskerı qyzmetkerdiń qaza bolǵany aıtyldy.
Buǵan deıin AQSh prezıdenti Donald Tramp Tegeran kelissózderdi qaıta bastamasa, Irannyń elektr stantsııalary men kópirlerine soqqy berýi múmkin ekenin málimdegen edi.
Eske salsaq, sársenbi kúni AQSh Iran porttaryna teńiz blokadasyn qaıta engizdi. Al Iran armııasy AQSh áskerı bazalaryna jasalatyn shabýyldar «tolyq jeńiske jetkenge deıin» toqtamaıtynyn málimdedi. Sonymen qatar Birikken Arab Ámirlikteri Ormýz buǵazynyń qorshaýǵa alynýyna baılanysty jańa port salýdy josparlap otyr.
