Iran elshisi Qazaqstannyń áýe kompanııalaryna eki arada týrıstik reısterdiń sanyn kóbeıtýdi usyndy

ASTANA. KAZINFORM – Irannyń Qazaqstandaǵy Tótenshe jáne ókiletti elshisi Alı Akbar Djoýkar Qazaqstannyń áýe kompanııalaryna eki arada týrıstik reısterdiń sanyn kóbeıtýdi usyndy.

- Biz Qazaqstanmen týrızm salasyndaǵy yntymaqtastyqty damytýdy kózdegen edik. Biraq ol salada aıtarlyqtaı jetistikterge qol jetkizgen joqpyz. Eki eldiń arasynda týrısterdiń kelip-ketý mólsheri óte az. Tipti Ortalyq Azııadaǵy birneshe memleketke ırandyq saıahatshylar Qazaqstanǵa qaraǵan kóp barady. Qazaqstandyq týrıster de Iranǵa az barady, - degen dıplomat elshiliktiń aldaǵy jumysynda týrızm salasyndaǵy baılanystardy arttyrý basym baǵytta bolatynyn atap ótti.

Elshi bul tendentsııaǵa eki arada tikeleı áýe reısteriniń azdyǵy da áser etip otyrǵanyn aıtady.

- Týrızm salasyndaǵy eń basty másele – kólik. Eki eldiń arasyndaǵy tikeleı reısterdiń sany óte az. Sondyqtan qazaqstandyq áýe kompanııalar Iranǵa týrıstik reıster jasasa, bul qazaqstandyq týrıster úshin óte qolaıly ári arzan baǵyttardyń biri bola alady. Men muny sizderge senimdi túrde aıta alamyn, - dedi Iran elshisi.

Eske salsaq, Iran men Ózbekstan birlesken týrızm komıtetin qurýy múmkin degen aqparat taraǵan edi. Sonymen qatar, Irannyń Qazaqstannan alatyn astyǵy bıyl da byltyrǵy kólemde saqtalýy múmkin ekendigi de aıtylǵan bolatyn.