Iran elshisi Bender-Abbas portynda Qazaqstan termınalyn salý keshigip jatqanyna alańdaýshylyq bildirdi
ASTANA. KAZINFORM – Iran Islam Respýblıkasynyń Qazaqstandaǵy Tótenshe jáne Ókiletti Elshisi Alı Akbar Djoýkar qazaqstandyq BAQ ókilderimen kezdesýde óz eliniń aýmaǵyndaǵy Bender-Abbas portynda Qazaqstannyń saýda termınalyn salý jobasy keshigip jatqanyna alańdaýshylyq bildirdi.
Dıplomat buǵan deıin Kazinform tilshisine bergen suhbatynda Iran Bender Abbas portynan Qazaqstanǵa saýda termınalyn salý úshin 15 gektar jer telimin bólgenin aıtqan edi.
Ol termınal arqyly Qazaqstan eksportqa jiberetin taýarlaryn Afrıka elderi men Shyǵys Azııaǵa, ásirese, Úndistan men Parsy shyǵanaǵyndaǵy elderge eksportty arttyra alatyny aıtylǵan.
BAQ ókilderimen osy jolǵy kezdesýinde elshi atalmysh jobanyń áli alǵa jyljymaı jatqanyn aıtty.
«Ókinishke qaraı, sóz júzinde qalyp tur, eshteńe ózgergen joq. Bul shara iske asqan joq. Qazaqstandyq áriptester múmkindikti jiberip alyp jatyr.
Qazaqstan termınalyna dep bólingen jer telimin basqa memleket alǵysy keletinin estigenmin. Bul logıstıka Qazaqstan basshysy Q.Toqaev myrza qýattaǵan máseleniń biri bolatyn. Eger iske aspasa, oryndy adamdar jaýap beretin shyǵar.
Buǵan deıin de aıtqanymdaı, bul port Qazaqstan úshin Taıaý Shyǵys pen Afrıkaǵa shyǵatyn dáliz retinde mańyzdy. Eki el de kólik-logıstıkalyq áleýetti arttyrýǵa múddeli. Biraq ol júzege aspaı jatyr», - deıdi Alı Akbar Djoýkar.
Aıta ketý kerek, atalmysh portta Qazaqstannyń termınalyn salý máselesi sonaý 2018 jyldan beri aıtylyp keledi.
