Iran eki banktiń aqparattyq júıesine kıbershabýyl jasalǵanyn habarlady
ASTANA. KAZINFORM — Irannyń kıberqorǵanys basqarmasy Izraıl uıymdastyrǵan kıbershabýyldarmen kúresýge májbúr bolǵanyn málimdedi, dep jazady AZERTADJ.
Agenttiktiń sheteldik aqparat quraldaryna silteme jasaı otyryp habarlaǵandaı, bul shabýyldar eldegi eki banktiń — Bank Sepah pen Bank Pasargad-tyń aqparattyq júıeleriniń isten shyǵýyna sebep boldy.
— Bizdiń kıberqaýipsizdik mamandarymyzdyń arqasynda bir banktiń júıesindegi aqaý tez arada joıyldy. Qazirgi ýaqytta ekinshi banktiń júıesin qalpyna keltirý jumystary jalǵasyp jatyr, — delingen Irannyń kıberqorǵanys basqarmasynyń málimdemesinde.
Press TV telearnasynyń habarlaýynsha, Iran tarapy bul shabýyldardan keıin Izraılge qarsy jaýap sharalaryn qolǵa alǵan.
Aıta keteıik, seısenbi kúni Irannyń jetekshi memlekettik bankteriniń biri Sepah Bank hakerlik toptyń aýqymdy kıbershabýylyna ushyrap, klıentterge qyzmet kórsetý men banktik júıelerge qoljetimdilikte úzilister boldy.
Sonymen qatar Iran bıligi halyqty WhatsApp qosymshasyn joıýǵa shaqyrdy. Tegeran tanymal messendjerdi qoldanýshylardyń derekterin jınady dep aıyptap otyr, alaıda naqty dálelder keltirilgen joq.
Búgin Irannyń ballıstıkalyq zymyrany Izraıldiń Beer-Sheva qalasyndaǵy «Soroka» medıtsınalyq ortalyǵyna tıip, beıbit turǵyndar jaraqat aldy.
Al Izraıl áskerı-áýe kúshteri Irannyń ıadrolyq baǵdarlamasyndaǵy negizgi nysan sanalatyn Araktaǵy aýyr sý reaktoryna áýeden soqqy berdi.
Buǵan deıin «Hezbolla» Álı Hameneıge qastandyq jasaýdyń saldary aýyr bolatynyn eskertti.