Iran eki aptalyq bitimge kelisti: kelissózder Islamabadta bastalady
ASTANA. KAZINFORM – Taıaý Shyǵystaǵy shıelenisti dıplomatııalyq jolmen retteýge baǵyttalǵan mańyzdy qadam jasaldy. AQSh prezıdenti Donald Tramp Iranǵa soqqylardy ýaqytsha toqtatýǵa daıyn ekenin málimdegennen keıin, resmı Tegeran eki aptalyq bitim sharttaryn qabyldady. Taraptar arasyndaǵy kelissózder juma kúni Islamabadta bastalmaq. Bul týraly Al Jazeera arnasy habarlady.
AQSh tarapy Iranǵa qarsy soqqylardy ýaqytsha toqtatýǵa daıyn ekenin, alaıda onyń basty sharty – Ormýz buǵazynyń tolyq ári qaýipsiz ashylýy ekenin málimdegen edi.
Iran Syrtqy ister mınıstri aldaǵy eki apta ishinde buǵaz arqyly kemelerdiń qaýipsiz ótýi eldiń qarýly kúshterimen úılestirile otyryp qamtamasyz etiletinin habarlady.
Tramptyń bul málimdemesi Pákistan Premer-mınıstri Shehbaz Sharıftiń ótinishinen keıin jasaldy. Ol AQSh prezıdentinen kelisimge kelý merzimin uzartýdy surap, Irandy Ormýz buǵazyn tolyq ashýǵa shaqyrǵan.
Aldyn ala málimetterge sáıkes, kelissózderdiń alǵashqy kezeńi juma kúni Islamabadta ótedi. Sarapshylar bul qadam aımaqtaǵy áskerı shıelenisti báseńdetýge jáne álemdik energetıkalyq naryqtaǵy turaqsyzdyqty azaıtýǵa yqpal etýi múmkin ekenin aıtady.
Ormýz buǵazy álemdik munaı tasymaly úshin strategııalyq mańyzǵa ıe. Álemdegi munaı jetkiziliminiń shamamen besten biri osy baǵyt arqyly ótetindikten, onyń qaıta ashylýy halyqaralyq naryqqa tikeleı áser etedi.
Aıta keteıik, buǵan deıin Tramp Irannyń energetıkalyq ınfraqurylymyna soqqy jasaýdy eki aptaǵa shegergenin jazdyq.
Al osy jańalyqtan keıin munaı baǵasy kúrt tómendedi.