Iran EAEO-ǵa táýelsiz qarjylyq esep aıyrysý júıesin qurýdy usyndy
ASTANA. KAZINFORM – Irannyń ónerkásip, kenishter jáne saýda mınıstri Seıed Mohammad Atabak EAEO aıasynda táýelsiz qarjylyq esep aıyrysý tetigin qurý bastamasyn kóterdi.
Iran mınıstri bir jyldan astam ýaqyt buryn Iran Islam Respýblıkasy men EAEO-ǵa múshe memleketter arasyndaǵy erkin saýda týraly kelisimdi iske asyrý bastalǵanyn eske saldy.
– Bul kelisim qatysýshy elderdiń ulttyq ekonomıkalary men kásipkerlerine jańa múmkindikter ashty, ózara saýda kólemin arttyrýǵa negiz qalady jáne qazirdiń ózinde elderimiz arasyndaǵy taýar aınalymynyń ósýine yqpal etip otyr. Bizdiń saýda áleýetimiz qazirgi kórsetkishterden áldeqaıda joǵary ekenine senimdimin jáne bul ósim jalǵasa beredi, – dedi Seıed Mohammad Atabak Astanada ótken Joǵary Eýrazııalyq ekonomıkalyq keńestiń otyrysynda.
Iran mınıstriniń aıtýynsha, bul qajetti ınfraqurylymdy qurý men damytýdy, sonyń ishinde táýelsiz qarjylyq esep aıyrysý tetigin qalyptastyrýdy jáne ulttyq valıýtalardy paıdalanýdy talap etedi.
— Iran Islam Respýblıkasy EAEO-ǵa múshe keıbir elderge qarsy baǵyttalǵan úshinshi memleketterdiń ádiletsiz ári zańsyz sanktsııalarynan uıymdy qorǵaý maqsatynda syrtqy kúshterge táýelsiz qarjylyq esep aıyrysý júıesin qurý qajet dep sanaıdy, — dedi ol.
Aıta keteıik, EAEO elderi jasandy ıntellektini jaýapkershilikpen damytý týraly birlesken málimdeme qabyldady.
