Iran EAEO elderiniń erkin ekonomıkalyq aımaǵy uıymyn qurýdy usyndy

ASTANA. KAZINFORM – Iran Syrtqy ister mınıstrliginiń ekonomıkalyq úılestirý departamentiniń bas dırektory Mohammad Reza Nazerı Eýrazııalyq ekonomıkalyq odaqqa múshe elderdiń erkin ekonomıkalyq aımaqtary arasynda yntymaqtastyqty damytýǵa arnalǵan uıym qurý bastamasyn kóterdi.

Atalǵan usynys óńir ekonomıkalaryn tereńirek yqpaldastyrýǵa jáne saýda múmkindikteriniń áleýetin barynsha tıimdi paıdalanýǵa baǵyttalǵan.

Nazerıdiń aıtýynsha, erkin ekonomıkalyq aımaqtar aıasynda taýarlardy ımporttaý, eksporttaý jáne reeksporttaý eń tómengi kedendik bajdarmen júzege asyrylady. Bul bıznes shyǵyndaryn edáýir qysqartýǵa múmkindik beredi.

Irannyń IRNA aqparat agenttiginiń jazýynsha, eldegi erkin ekonomıkalyq aımaqtarda sheteldik ınvestorlardy yntalandyrýǵa jáne qorǵaýǵa baǵyttalǵan arnaıy zańnamalyq normalar qoldanylady. Atap aıtqanda:

– 5 jyldan 10 jylǵa deıingi merzimge salyqtyq jeńildikter;
– negizgi kapıtaldyń saqtalýyna jáne alynǵan paıdany elden shyǵarýǵa kepildik;
– ınvestıtsııalardy engizý men áketýdiń jeńildetilgen tártibi.

Buǵan deıin EAEO elderi kontrafaktilik kontentke qarsy birlesken sharalar ázirlep jatqany habarlanǵan bolatyn.