Iran delegatsııasy Islamabadqa keldi

ASTANA. KAZINFORM – Iran úkimettik delegatsııasy AQSh-pen kelissózder ótkizý úshin Islamabadqa keldi, dep habarlaıdy BBC.

Irandyq memlekettik BAQ málimetinshe, delegatsııany Mohammad-Bager Galıbaf basqarady. Quramynda syrtqy ister mınıstri Abbas Aragchı, Qaýipsizdik keńesiniń ókili Alı-Akbar Ahmadııan, ortalyq bank basshysy Abdolnaser Hemmatı jáne parlament depýtattary bar.

Aıta keteıik, Iran sońǵy sátke deıin kelissózderge qatysatynyn naqty rastaǵan joq. Buǵan deıin resmı tulǵalar, sonyń ishinde Galıbaf jarııalanǵan bitim sharttary tolyq oryndalmaǵanyn, ásirese Lıvandaǵy áskerı is-qımyldardyń toqtamaǵanyn málimdegen.

Sonymen qatar, Iran Ormýz buǵazyn jabyq kúıde ustap otyr, bul bitimniń turaqtylyǵyna kúmán týdyrady.

AQSh delegatsııasyn Djeı Dı Vens bastap keledi. Ol qazirgi ýaqytta Islamabadqa ushyp bara jatyr. Ushý barysynda onyń ushaǵy Parıjde janarmaı quıý úshin toqtaǵan.

Pákistan premer-mınıstri Shahbaz Sharıf kelissózderdiń mańyzyna toqtalyp, olardyń nátıjesi aımaqta beıbit sheshimniń bolashaǵyn aıqyndaıtynyn aıtty.

– Bul kelissózder qaqtyǵystyń beıbit jolmen sheshilý-sheshilmeýin anyqtaıtyn kezeń bolady, – dedi ol.

Buǵan deıin Vens kelissózderge qatysty pikir bildirip, AQSh Iran adal áreket etken jaǵdaıda dıalogqa daıyn ekenin atap ótken. Sonymen qatar, Donald Tramp kelissózder boıynsha naqty tapsyrmalar bergeni aıtyldy.