Iran daǵdarysy AQSh senatyndaǵy daý-damaıdyń tasasynda qaldy
ASTANA.KAZINFORM - AQSh Qorǵanys mınıstri Pıt Hegsettiń qatysýymen bolǵan senattaǵy tyńdaýlar barysynda amerıkalyq áskerdi AQSh ishinde paıdalanýǵa qatysty kelispeýshilikter týyndady, dep habarlaıdy The New York Times.
Prezıdent Donald Tramp Iran basshylyǵynan kapıtýlıatsııany talap etip otyrǵanda senatorlar ákimshilikti armııany saıasılandyrdy jáne qarýly kúshterdiń ımıdjine nuqsan keltirdi dep aıyptady.
Qarýly kúshter komıtetindegi qorǵanys bıýdjeti týraly tyńdaýlar kezinde demokrattar Tramptyń memlekettik jáne jergilikti kóshbasshylardyń qarsy bolýyna qaramastan teńiz jaıaý áskerleri men Ulttyq gvardııany Los-Andjeleske ornalastyrýy armııany ózi qorǵaýy tıis azamattarǵa qarsy qoıatynyn aıtyp, shaǵymdandy.
- Meniń partııalas áriptesterim, ásirese áskerde bolǵandar saıası isterge aralaspaıtyn armııany qalyptastyrýǵa tyrysýy kerek, azamattar ózderiniń áskerinen qoryqpaýy tıis,- dedi Mıchıgannan saılanǵan demokrat Elıssa Slotkın.
Respýblıkalyqtar burynǵy prezıdent Djo Baıdenniń saıasaty transgender soldattarǵa ashyq qyzmet etip, olardyń abort jasatýyn qarjylandyryp, aıtarlyqtaı shyǵyn keltirdi, dep qarsy shyqty.
- Biz tórt jylda armııanyń týra osylaı saıasılandyrylǵanynan eshqashan kórgen emespiz, - dedi Indıanadan saılanǵan senator Djım Benks.
Tramp sársenbi kúni amerıkalyq áskerge Irannyń ıadrolyq reaktorlaryna shabýyldaýǵa buıryq bere me jáne Izrıaldiń soǵysyna qatysa ma ? degen saýalǵa tikeleı jaýap berýden bas tartty.
- Men muny isteı alamyn, men muny istemeýim de múmkin. Aıtaıyn degenim, meniń ne isteıtinimdi eshkim bilmeıdi, - dedi Donald Tramp.
Senattaǵy tyńdaý demokrattar men respýblıkashyldar arasyndaǵy áskerdi qalaı jáne qashan qoldaný kerektigi týraly taǵy bir kelispeýshilikke negiz boldy.
Hegset: «Men okrýg sottary ulttyq qaýipsizdik saıasatyn anyqtaýy kerek dep eseptemeımin», dedi. Alaıda ol Joǵarǵy sottyń sheshimine qurmetpen qaraıtynyn aıtty.
Hegset Iranǵa soqqy jasaý, ızraıldikterge Irannyń ıadrolyq áleýetin joıýǵa kómektesý boıynsha prezıdent úshin basqa da múmkindikterdi qarastyryp otyrsyz ba, degen saýaldan jaltaryp ketti.
- Qorǵanys mınıstrligindegi bizdiń maqsatymyz daıyn bolý jáne múmkindikterdi qarastyrý. Biz dál osylaı istep jatyrmyz, - dedi Pıt Hegset.
Los-Anjeleske taǵy 2000 ásker jiberilgeni buǵan deıin habarlanǵan. Sonymen qatar, respýblıkandyqtar men demokrattardyń kongres toptary Taıaý Shyǵysta soǵys bastamas buryn Tramp ákimshiliginen kongrestiń maquldaýyn alýdy talap etetin qarar qabyldaýdy josparlap otyr.
Osyǵan deıin AQSh azamattaryn Izraılden evakýatsııalap jatqany týraly jazdyq.