Iran BUU sanktsııalarynyń qaıta kúshine enýine qatań jaýap beretinin málimdedi
ASTANA. KAZINFORM – Tegeran Irannyń ıadrolyq baǵdarlamasyna qatysty BUU sanktsııalary qaıta kúshine engen soń «qatań ári laıyqty jaýap» beretinin málimdedi, dep habarlaıdy DW.
Iran Syrtqy ister mınıstrliginiń 28 qyrkúıekte taratqan málimdemesinde: «Islam Respýblıkasy óz quqyqtary men ulttyq múddelerin tabandy túrde qorǵaıdy. Halyqtyń múddeleri men quqyqtaryna qarsy kez kelgen áreketke qatań ári laıyqty jaýap beriledi», – delingen.
Sonymen qatar Iran halyqaralyq qaýymdastyqty sanktsııalarǵa qarsy turýǵa shaqyrdy.
Tegerannyń pikirinshe, olardy qaıta engizý «quqyqtyq turǵydan negizsiz ári qabyldaýǵa bolmaıtyn qadam».
BUU Qaýipsizdik Keńesiniń Iranǵa qatysty sanktsııalary 28 qyrkúıekke qaraǵan túni qaıta kúshine endi. Bul shekteýler 2015 jyly Tegerannyń ıadrolyq baǵdarlamasyna baılanysty qol qoıylǵan Birlesken jan-jaqty is-qımyl jospary aıasynda toqtatylǵan bolatyn. Atalǵan kelisimde Iran tarapynan eleýli buzýshylyqtar anyqtalsa, sanktsııalardyń qaıta engiziletini qarastyrylǵan edi.
2018 jyly AQSh-tyń sol kezdegi prezıdenti Donald Tramp elin kelisimnen shyǵaryp, Tegerandy mindettemelerin oryndamady dep aıyptap, jańa sanktsııalar engizgen bolatyn. Osydan keıin Iran kelisim aıasyndaǵy óz mindettemelerin birtindep oryndaýdan bas tartyp, ıadrolyq nysandarda ýran baıytýdy qaıta bastady.
AQSh bıliginiń baǵalaýynsha, Iran kelisimde belgilengen normany tórt esege asyryp otyr.
2025 jylǵy tamyz aıynyń sońynda Ulybrıtanııa, Germanııa jáne Frantsııa syrtqy ister mınıstrleri BUU Bas hatshysyna jáne Qaýipsizdik Keńesi tóraǵasyna joldaǵan hatynda Tegerandy Birlesken jan-jaqty is-qımyl jospary sharttaryn oryndamady dep aıyptap, sanktsııalardy qaıta engizýdi talap etti. Osylaısha olar ıadrolyq kelisimde kórsetilgen «sanktsııalardy avtomatty túrde qaıta engizý tetigin» (Snapback) iske qosty, ol sanktsııalardy jedel qalpyna keltirýdi kózdeıdi.
Aıta keteıik, buǵan deıin BUU Qaýipsizdik Keńesi Iranǵa qatysty sanktsııalardy toqtata almaǵany habarlandy.