Iran Tramptyń málimdemesinen keıin BUU-ny áreket etýge shaqyrdy
ASTANA. KAZINFORM — Irannyń BUU-daǵy turaqty ókili Amır Saıd Iravanı BUU Bas hatshysy men Qaýipsizdik keńesiniń tóraǵasyna hat joldap, AQSh prezıdenti Donald Tramptyń Tegeranǵa jasaǵan «zańsyz qaterlerin» aıyptaýdy surady. Bul oqıǵa eldegi jalǵasyp jatqan narazylyqtar aıasynda bolǵan.
Al Jazeera habarlaýynsha, Tramp Irandaǵy narazylyqtardyń jalǵasyp jatqandyǵy týraly málimdep, eger sherýshilerge qarsy zorlyq-zombylyq qoldanylatyn bolsa, AQSh «kúresýge daıyn» ekenin aıtqan.
Iravanı BUU basshysy Antonıo Gýterrıshti jáne Qaýipsizdik keńesiniń múshelerin Tramptyń «quqyqqa qaıshy jáne provokatsııalyq málimdemelerin» qatań aıyptaýǵa shaqyrdy. Ol bul áreketterdi BUU Jarǵysy men halyqaralyq quqyqty buzý dep atap ótti.
— Qandaı da bir ishki tártipsizdikterdi syrtqy qysym nemese áskerı aralasý arqyly qozdyrý, qoldaý kórsetý nemese zańdastyrý — bul Iran Islam Respýblıkasynyń egemendigine, saıası táýelsizdigine jáne aýmaqtyq tutastyǵyna qarsy aýyr quqyqbuzýshylyq, — dep jazdy Iravanı.
Hatta Iran úkimeti óz «egemendigin qorǵaýǵa» degen quqyǵyn rastaǵan jáne ony «qatań ári teńgerimdi túrde júzege asyratynyn» atap ótti.
— AQSh bul zańsyz qaýipterdiń jáne keıingi shıelenistiń barlyq saldary úshin tolyq jaýapkershilikti moınyna alýy tıis, — dep qosty Iravanı.
Eske sala ketsek, Irandaǵy narazylyqtar birneshe kún boıy jalǵasyp keledi, olar negizinen ulttyq valıýtanyń kúrt quldyraýy men baǵanyń ósýimen baılanysty. El bıligi dıalogqa daıyn ekenin, biraq syrtqy qysym men aralasýdy qabyldamaıtynyn málimdedi.
Mehr agenttiginiń habarlaýynsha, Irannyń batys bóligindegi búlikshiler qarý alyp kóshelerge shyqqan. Shýshter qalasynyń polıtsııasy narazylyq bildirýshilerdiń bir tobyn ustap, olardyń qolyndaǵy qarý-jaraqty tárkilegen.
Sońǵy málimetter boıynsha, tártipsizdikter saldarynan kem degende toǵyz adam qaza tapty, taǵy 44 adam tutqyndalǵan.
Óz kezeginde Donald Tramp Iran bıligin eskertip, eger Iran beıbit sherý jasaýshylardy atyp, óltirse, AQSh solarǵa qoldaý kórsetý úshin kómekke keletinin, ári tolyq áskerı daıyndyqta turǵanyn aıtqan.
Keıin Irannyń resmı tulǵalary AQSh-qa qatań eskertý jasap, syrtqy aralasýdyń ulttyq qaýipsizdikke tóngen qaýip retinde baǵalanatynyn málimdedi.