Iran BUU-ǵa AQSh tarapynan áskerı agressııa bolǵan jaǵdaıda «batyl» jaýap beretinin eskertti
ASTANA. KAZINFORM — Tegeran ózin-ózi qorǵaý quqyǵyna ıe ekenin málimdep, yqtımal shıelenistiń saldary úshin jaýapkershilikti Vashıngtonǵa júktedi, dep habarlaıdy Kazinform agenttiginiń menshikti tilshisi.
Irannyń BUU janyndaǵy Turaqty ókildigi BUU Bas hatshysy Antonıý Gýterrıshke jáne osy aıda Qaýipsizdik Keńesine tóraǵalyq etip otyrǵan Ulybrıtanııa ókiline hat joldap, AQSh tarapynan áskerı agressııa jasalǵan jaǵdaıda «batyl ári shamalas» jaýap berýge daıyn ekenin eskertti.
— Eger Iran Islam Respýblıkasy áskerı agressııaǵa ushyrasa, ol BUU Jarǵysynyń 51-babyna sáıkes ajyramas ózin-ózi qorǵaý quqyǵyn júzege asyra otyryp, batyl jáne proportsıonaldy túrde jaýap beredi, — delingen qujatta.
Hatta aımaqtaǵy «jaý kúshiniń» barlyq bazalary, nysandary men aktıvteri qorǵanys sharalary aıasynda zańdy nysana retinde qarastyrylatyny atap kórsetilgen. Iran tarapy yqtımal «baqylaýsyz jáne boljaýǵa kelmeıtin saldarlar» úshin tolyq ári tikeleı jaýapkershilik AQSh-qa júkteletinin málimdedi.
Sondaı-aq Tegeran soǵysqa umtylmaıtynyn jáne qarýly qaqtyǵysty bastamaıtynyn jetkizdi. Alaıda AQSh prezıdenti Donald Tramptyń sońǵy málimdemeleri «naqty áskerı agressııa qaýpiniń belgisi» retinde baǵalanǵan.
— Iran Islam Respýblıkasy eń joǵary deńgeıde birneshe ret shıelenis pen soǵysty qalamaıtynyn jáne eshqandaı soǵys bastamaıtynyn málimdedi, — dep keltiredi Irannyń BUU janyndaǵy turaqty ókili Amır Saıd Iravanıdiń sózin IRNA agenttigi.
Qujatta mundaı rıtorıka óńir úshin apatty saldarǵa ákelip, halyqaralyq beıbitshilik pen qaýipsizdikke qater tóndirýi múmkin ekeni aıtylǵan.
Iran BUU Qaýipsizdik Keńesi men Bas hatshysyn «tym kesh bolmaı turyp, shuǵyl áreket etýge» shaqyrdy. Sonymen qatar hatta BUU Jarǵysy qaǵıdattaryn saqtaý shartymen ıadrolyq másele boıynsha kelissózderdi jalǵastyrýǵa daıyn ekeni jáne dıplomatııalyq sheshimderdi qoldaıtyny rastalǵan.
Buǵan deıin Donald Tramp Irannyń ıadrolyq baǵdarlamasy boıynsha kelisimge qol jetkizilmegen jaǵdaıda kúsh qoldaný múmkindigin joqqa shyǵarmaıtynyn aıtyp, Tegeranǵa kelisim jasaý úshin shekteýli merzim belgilegen bolatyn.
Al jýyrda Irannyń Atom energııasy uıymynyń basshysy Muhammad Eslamı eshbir el Islam Respýblıkasyn ýrandy baıytý quqyǵynan aıyra almaıtynyn málimdedi.