Iran BUU Qaýipsizdik Keńesine shuǵyl hat joldady
ASTANA. KAZINFORM - AQSh-tyń Irandaǵy ıadrolyq nysandarǵa jasaǵan shabýylyna baılanysty Irannyń BUU janyndaǵy elshisi ári turaqty ókili Amır Saıd Iravanı jeksenbi kúni BUU Bas hatshysy men Qaýipsizdik Keńesiniń tóraǵasyna resmı hat joldady, dep habarlaıdy IRNA.
BUU-daǵy Iran ókili AQSh-tyń áreketin qatań aıyptap, Qaýipsizdik Keńesiniń shuǵyl otyrysyn talap etti.
BUU-ǵa joldaǵan hatynda Irannyń turaqty ókili Amır Saıd Iravanı AQSh-tyń aldyn ala josparlanǵan agressıvti áreketterin qatań aıyptady.
— Iran Islam Respýblıkasy eshqandaı arandatýshylyq sebepsiz jasalǵan bul aldyn ala josparlanǵan agressıvti áreketterdi qatań túrde aıyptaıdy. Bul shabýyldar — 13 maýsymda Izraıl rejımi Irannyń beıbit ıadrolyq nysandaryna jasaǵan aýqymdy áskerı operatsııasynyń jalǵasy, — delingen hat mátininde.
Iran ókili BUU Qaýipsizdik Keńesiniń shuǵyl otyrysyn ótkizip, bul shabýyldardy barynsha qatań túrde aıyptaýdy talap etti.
Eske salaıyq, AQSh Irannyń ıadrolyq nysandaryna soqqy jasaǵan bolatyn. Donald Tramp bul operatsııany sátti dep baǵalady.