Iran boıynsha kelissózder eń qıyn kezeńge ótti

ASTANA. KAZINFORM - Tegeran kelissózderdiń «syndarly kezeńge» jetkeni týraly málimdemeleri óńirdegi shıelenistiń kúsheıýi jáne energetıkalyq nysandarǵa jasalǵan ózara soqqylar aıasynda aıtyldy, dep habarlaıdy Kazinform agenttiginiń menshikti tilshisi.

Irannyń Pákistandaǵy elshisi Reza Amırı Mogadam seısenbi kúni Islamabadtyń AQSh pen Izraıldiń Iranǵa qarsy soǵysyn toqtatýǵa baǵyttalǵan kúsh-jigeri «syndarly ári sezimtal kezeńge» jetkenin málimdedi.

— Soǵysty toqtatýǵa baǵyttalǵan Pákistannyń izgi nıeti men deldaldyq aıasyndaǵy oń ári nátıjeli áreketteri syndarly, sezimtal kezeńge jaqyndap qaldy, — dedi dıplomat.

Reuters málimetinshe, AQSh pen Iran arasyndaǵy dıalogty uıymdastyrýǵa baǵyttalǵan kelissózder áli júrip jatyr, alaıda jaǵdaı turaqsyz.

Agenttik derekkózderiniń aıtýynsha, Irannyń Saýd Arabııasyndaǵy nysandarǵa jasaǵan zymyran soqqylary dıplomatııalyq úderisti buzýy múmkin.

Islam revolıýtsııasy saqshylary korpýsynyń málimdeýinshe, Iran Saýd Arabııasynyń Ál-Jýbaıl qalasyndaǵy munaı-hımııa keshenine soqqy jasaǵan. Bul — koroldiktiń munaı óńdeý jáne munaı-hımııa salasyndaǵy negizgi ortalyqtarynyń biri.

Atap aıtqanda, Saudi Aramco men Dow birlesip júzege asyryp otyrǵan Sadara kesheni jáne halyqaralyq energetıkalyq kompanııalar qatysatyn ózge de kásiporyndar nysanaǵa alynǵany aıtyldy.

Saýd tarapy buǵan deıin eldiń shyǵys óńirine baǵyttalǵan jeti ballıstıkalyq zymyrannyń qaǵyp túsirilgenin habarlaǵan. Koroldiktiń qorǵanys mınıstrliginiń dereginshe, zymyran synyqtary energetıkalyq ınfraqurylym mańyna qulaǵan.

Iran óz kezeginde bul shabýyldar Asalýıe aýdanyndaǵy munaı-hımııa nysandaryna jasalǵan soqqylarǵa jaýap bolǵanyn málimdedi. Bul óńirde eldegi eń iri gaz jáne munaı-hımııa klasterleriniń biri ornalasqan.

Aıta keteıik, osyǵan deıin Tramp Irandy seısenbi kúni bir túnde «joıyp jiberemin» dep qorqytqan bolatyn.