Iran bıligi narazylyq aktsııasyn uıymdastyrǵandar tutqyndalǵanyn habarlady
ASTANA.KAZINFORM - Iran bıligi sońǵy eki apta boıy elde jalǵasyp kele jatqan narazylyq aktsııasynyń negizgi qatysýshylary tutqyndalǵanyn málimdedi, dep habarlaıdy Kazinform agenttiginiń menshikti tilshisi.
Búgin, 11 qańtarda Iran Ulttyq polıtsııasynyń bastyǵy Ahmad-Reza Radan tártipsizdikterge negizgi qatysýshy dep sanalatyn adamdardyń túnde tutqyndalǵanyn málimdedi. Bul týraly AFP agenttigi habarlady.
- Keshe túnde (senbi, 10 qańtar) tártipsizdikterge negizgi qatysýshylar tutqyndaldy, olar Qudaı qalasa, sot isin júrgizýden keıin jazalanady, - dedi ol memlekettik telearnaǵa.
Polıtsııa bastyǵy ustalǵandardyń sanyn nemese olardyń jeke basyn naqtylaǵan joq.
Narazylyq aktsııalary kezinde elde ınternetke qatań shekteý qoıylǵan. Jeksenbi kúni tańerteń NetBlocks monıtorıng uıymy Iranda búkil el boıynsha baılanys úzilýi 60 saǵattan astam ýaqytqa sozylǵanyn habarlady.
Uıym mundaı sharalar el úshin mańyzdy kezeńde azamattardyń qaýipsizdigi men ál-aýqatyna tikeleı qaýip tóndiretinin málimdedi.
Norvegııada ornalasqan adam quqyqtary Iran Human Rights uıymy málimeti boıynsha, eki aptaǵa sozylǵan narazylyq aktsııalary kezinde Iranda kem degende 192 adam qaza tapqan.
Iran sheneýnikteri buǵan túsinikteme bergen joq.
Búgin Iran parlamentiniń spıkeri AQSh elge shabýyl jasasa, AQSh áskerı kúshteri men Izraıl «zańdy nysana» bolatynyn eskertti.
