Iran baıytylǵan ýran qoryn elden shyǵarýǵa tyıym saldy — Reuters
ASTANA. KAZINFORM — Iran bıligi elden joǵary deńgeıde baıytylǵan ýran qoryn shyǵarýǵa tyıym saldy. Bul týraly Reuters agenttigine silteme jasap Kazinform agenttiginiń Taıaý Shyǵystaǵy menshikti tilshisi habarlady.
Málimetke sáıkes, Irannyń joǵarǵy jetekshisi Modjtaba Hameneı qarý jasaýǵa jaqyn deńgeıde baıytylǵan ýrandy shetelge shyǵarmaý týraly tapsyrma bergen.
Reuters agenttigine pikir bildirgen joǵary laýazymdy eki ırandyq derekkóz bul sheshim Iran basshylyǵynyń strategııalyq materıaldy el aýmaǵynda saqtaý jónindegi ortaq ustanymyn kórsetetinin aıtqan.
Exclusive: Supreme Leader says enriched uranium must stay in Iran, Iranian sources say https://t.co/QEAu51kFcF https://t.co/QEAu51kFcF pic.twitter.com/Ky6Wub0diP
— Reuters (@Reuters) May 21, 2026
Sóz ýrandy 60 paıyzǵa deıin baıytylǵan qor týraly bolyp otyr. Halyqaralyq atom energııasy agenttigi málimetinshe, 2025 jylǵy maýsymda AQSh pen Izraıldiń Irandaǵy ıadrolyq nysandarǵa jasaǵan soqqylaryna deıin mundaı ýran kólemi shamamen 440,9 keli bolǵan.
Izraıl bıligi buǵan deıin bul kólem qosymsha baıytylǵan jaǵdaıda birneshe ıadrolyq oqtumsyq jasaýǵa teorııalyq turǵyda jetkilikti ekenin málimdegen.
Al Iran ıadrolyq qarý jasaýǵa umtylyp otyr degen aıyptaýlardy joqqa shyǵaryp keledi. Tegeran ıadrolyq baǵdarlamanyń beıbit maqsatqa baǵyttalǵanyn alǵa tartady.
Reuters derekkózderiniń aıtýynsha, Iran bıligi ýran qoryn shetelge shyǵarý eldi AQSh pen Izraıldiń yqtımal jańa shabýyldary aldynda álsiz ete túsedi dep qaýiptenedi.
Agenttik málimetine qaraǵanda, soǵys bastalǵanǵa deıin Iran ýran qorynyń bir bóligin shetelge shyǵarýǵa daıyn bolǵan. Alaıda AQSh prezıdenti Donald Trump Islam respýblıkasyna qarsy jańa soqqylar jasaý qaýpi týraly aıtqannan keıin Tegerannyń ustanymy ózgergen.
Osy jaǵdaı aıasynda Iran Vashıngtonǵa áli de senimsizdik tanytyp otyr. Iran basshylyǵy qazirgi áskerı úzilisti AQSh-tyń keıingi shabýyldarǵa daıyndalý úshin nazaryn burýǵa baǵyttalǵan taktıkalyq qadamy bolýy múmkin dep esepteıdi.
Iran bıligi ázirge bul aqparatqa resmı túsinikteme bergen joq.
Soǵan qaramastan taraptar deldaldar arqyly baılanysty jalǵastyryp otyr. Iran Syrtqy ister mınıstrliginiń ókili Esmaıl Bagaı beısenbi kúni Tegeran AQSh-tyń atysty toqtatý jónindegi Irannyń sońǵy usynysyna bergen jaýabyn qarap jatqanyn aıtty.
Nour News agenttiginiń habarlaýynsha, Vashıngton men Tegeran Pákistan arqyly 14 tarmaqtan turatyn kelisim jobasynyń tujyrymdary boıynsha habar almasyp jatyr.
Qosymsha kelissózder Islamabad baǵyty boıynsha da júrip jatyr. Irannyń ISNA agenttigi Pákistan armııasynyń bas qolbasshysy Asım Mýnır Tegeranǵa saparynyń maqsaty Iran men AQSh arasyndaǵy kelispeýshilikterdi azaıtý jáne ortaq mámilege kelýge yqpal etý ekenin jazdy.
Aqparatqa sáıkes, Tegeranda Iran usynǵan jobanyń qurylymy, yqtımal kepildikter men senim sharalarynyń tetikteri de talqylanyp jatyr.
Osyǵan deıin Iran Ormýz buǵazyn basqarýǵa arnalǵan jańa organnyń qurylatynyn jarııalaǵany týraly jazdyq.
